இந்தியாவில் முக்கிய பிரமுகர்களை கொல்ல பாகிஸ்தானின் உளவு அமைப்பு சதி: பிரதமரின் வாகன முற்றுகை பின்னணியில் திடுக்கிட வைக்கும் தகவல்!

ஐஏஎன்எஸ் அறிக்கையின்படி, பஞ்சாபில் தேர்தலை சீர்குலைக்க பாகிஸ்தானின் இன்டர்-சர்வீசஸ் இன்டலிஜென்ஸ் (ஐஎஸ்ஐ), பயங்கரவாத அமைப்புகளை தூண்டிவிட்டதாக உளவுத்துறை அமைப்புகள் எச்சரிக்கை விடுத்துள்ளன.

பஞ்சாப், உ.பி., மற்றும் உத்தரகண்ட் ஆகிய மாநிலங்களில் தேர்தல் பணியின் போது சீக்கிய பயங்கரவாத அமைப்புகள் தேர்தல் பேரணிகளை குறிவைத்து, முக்கிய பிரமுகர்களை படுகொலை செய்ய முயற்சி செய்யலாம் என ஐஏஎன்எஸ் அறிக்கை தெரிவிக்கிறது. பஞ்சாப் மாநிலம் ஃபெரோஸ்பூரில் பிரதமர் மோடியின் வாகனத் தொடரணியை முற்றுகையிட்டதற்கு சீக்கிய பயங்கரவாத அமைப்பான சீக்ஸ் ஃபார் ஜஸ்டிஸ் சமீபத்தில் பொறுப்பேற்றுள்ளது குறிப்பிடத்தக்கது.

பஞ்சாப் மாநிலத்தில் காலிஸ்தானி இயக்கத்தை மீண்டும் செயல்படுத்துவதற்கான ஒரு வாய்ப்பாக பஞ்சாப் தவிர, சீக்கிய வாக்காளர்கள் அதிகம் உள்ள மாநிலங்களை ஐஎஸ்ஐ குறிவைக்கிறது. ஆதாரங்களின்படி, தேர்தல் செயல்முறையைத் தடம் புரட்ட பல பயங்கரவாத குழுக்களை செயல்படுத்தியுள்ளது.

இந்த மாநிலங்களில் சீக்கிய மக்களின் ஆதரவைப் பெற பயங்கரவாத அமைப்புகள் முயற்சி செய்கின்றன. மாநில அரசுகள் விழிப்புடன் இருக்கவும், சாத்தியமான பயங்கரவாதச் செயல்களைக் கண்காணிக்கவும் உளவுத்துறை கேட்டுக் கொண்டுள்ளது. சீக்கிய மதத் தலைவர்கள் மற்றும் முக்கிய நபர்களுடன் நிர்வாகம் தொடர்பில் இருக்கவும் அவர்கள் பரிந்துரைத்துள்ளனர்.

பஞ்சாப் மற்றும் பாகிஸ்தானுக்கு இடையேயான சர்வதேச எல்லைக்கு அப்பால் உள்ள கிராமங்களில் ISYF வலுவான செல்வாக்கைக் கொண்டுள்ளது. ISYF உடன் தொடர்புடைய பல உதவியாளர்கள் வெடிகுண்டுகள் மற்றும் வெடிக்கும் சாதனங்களை தயாரிப்பதில் பயிற்சி பெற்றுள்ளதாக அறிக்கைகள் தெரிவிக்கின்றன.

சமீப காலமாக, ட்ரோன்களை பயன்படுத்தி ஆயுதங்கள் மற்றும் வெடிபொருட்களை வீசுவது பாதுகாப்பு நிறுவனங்களுக்கு பெரும் சவாலாக உள்ளது. பஞ்சாப் மாநிலத்தில் உள்ள இந்திய-பாகிஸ்தான் எல்லையில் ட்ரோன்கள் பயன்படுத்தப்பட்ட 60 சம்பவங்கள் இதுவரை வெளிச்சத்துக்கு வந்துள்ளன.

ஆப்கானிஸ்தானை தலிபான்கள் கைப்பற்றியதில் இருந்து, பாகிஸ்தான் ஆக்கிரமிப்பு காஷ்மீரில் உள்ள இந்த அமைப்புகள் ஜம்மு காஷ்மீரில் தங்கள் நடவடிக்கைகளை அதிகரித்துள்ளன.