QUAD கூட்டமைப்புடன் இணைந்து செயல்பட மற்ற நாடுகளுக்கும் அழைப்பு!
By : Bharathi Latha
சுதந்திரமான மற்றும் பாதுகாப்பான இந்தோ-பசிபிக் பிராந்தியத்திற்கான தனது உறுதிப்பாட்டை மீண்டும் வலியுறுத்தியது இந்தியா, அமெரிக்கா, ஜப்பான் மற்றும் ஆஸ்திரேலியா ஆகிய நாடுகளின் கூட்டமைப்பான குவாட் அமைப்பின் தலைவர்கள். இதே இலக்குகளைப் பகிர்ந்து கொள்ளும் மற்ற நாடுகளுடன் இணைந்து பணியாற்றுவதாக உறுதியளித்தனர் மற்றும் கொரோனா தடுப்பூசிகள் இந்தோ-பசிபிக் பிராந்திய நாடுகளுக்கு 2022 ஆம் ஆண்டிற்குள் கிடைப்பதை உறுதி செய்தனர்.
தங்களது முதல் உச்சிமாநாட்டில், குவாட் கூட்டமைப்பைச் சேர்ந்த நான்கு நாடுகளின் தலைவர்களும் நேற்று மிக முக்கிய முடிவு ஒன்றை எடுத்துள்ளனர். இதன் கீழ் இந்தோ-பசிபிக் ஏற்றுமதிக்காக 2022ஆம் ஆண்டில் ஒரு பில்லியன் கொரோனா வைரஸ் தடுப்பூசி அளவுகளை வெளியிடுவதற்கு கூடுதல் உற்பத்தி திறன்களை உருவாக்க இந்தியாவில் பெரும் முதலீடுகள் செய்யப்படும் என்பதும் குறிப்பிடத்தக்கது.
இந்திய பிரதமர் நரேந்திர மோடி, அமெரிக்க அதிபர் ஜோ பிடன், ஆஸ்திரேலியா பிரதமர் ஸ்காட் மோரிசன் மற்றும் ஜப்பான் பிரதமர் யோஷிஹைட் சுகா ஆகியோரால் தி வாஷிங்டன் போஸ்ட்டில் கூட்டாக எழுதப்பட்ட கருத்துக் கட்டுரையில், குவாட் நெருக்கடியான சூழ்நிலையில் உருவானதாக குறிப்பிட்டுள்ளனர்.
இது 2007 இல் ஒரு இராஜதந்திர உரையாடலாக மாறியது மற்றும் 2017இல் மறுபிறவி எடுத்தது. "இப்போது, இந்தோ-பசிபிக் முழுவதிலும் ஒன்றோடொன்று இணைந்திருக்கும் இந்த புதிய யுகத்தில், தேவைப்படும் ஒரு பிராந்தியத்திற்கு ஆதரவாக மீண்டும் செயல்பட நாங்கள் மீண்டும் அழைக்கப்படுகிறோம்" என்று குவாட்டின் நான்கு தலைவர்கள் தி வாஷிங்டன் போஸ்ட்டில் எழுதியுள்ள கட்டுரையில் தெரிவித்தனர்.
"திறந்த மற்றும் சுதந்திரமான ஒரு பிராந்தியத்திற்கான எங்கள் தேடலை வலுப்படுத்த, புதிய தொழில்நுட்பங்கள் முன்வைக்கும் சவால்களை எதிர்கொள்ள பங்குதாரராக ஒப்புக் கொண்டுள்ளோம். மேலும் எதிர்காலத்தின் புதுமைகளை நிர்வகிக்கும் விதிமுறைகளையும் தரங்களையும் அமைப்பதற்கு ஒத்துழைக்கிறோம்.
காலநிலை மாற்றம் மற்றும் இந்தோ-பசிபிக் பிராந்தியத்தை உள்ளடக்கிய ஒரு மூலோபாய முன்னுரிமை ஆகிய இரண்டுமே தற்போது முக்கிய சவாலாக மாறியுள்ளது" என கட்டுரையில் மேலும் குறிப்பிடப்பட்டுள்ளது. பாரிஸ் ஒப்பந்தத்தை வலுப்படுத்தவும், அனைத்து நாடுகளின் காலநிலை நடவடிக்கைகளை மேம்படுத்தவும் நான்கு நாடுகளும் ஒன்றிணைந்து மற்றவர்களுடன் இணைந்து செயல்படும் என்று கூட்டாக முடிவெடுக்கப்பட்டுள்ளதாக தலைவர்கள் தெரிவித்துள்ளனர்.
