ரசிகர்கள் கொந்தளிப்பு.. பாதி படத்திலேயே நிறுத்தப்பட்ட மாஸ்டர்.!

புதுச்சேரி மாநிலம் காரைக்காலில் நடிகர் விஜய் நடிப்பில் வெளியான மாஸ்டர் திரைப்படம் பாதியிலே நிறுத்தப்பட்டதால் ரசிகர்கள் அதிர்ச்சியடைந்தனர்.

கொரோனா வைரஸ் தொற்று காரணமாக கடந்த 9 மாதங்களாக எந்த ஒரு புதிய படமும் வெளியாகவில்லை. இதனிடையே மத்திய, மாநில அரசுகள் தியேட்டர்களை 50 சதவீத பார்வையாளர்களுடன் திறக்கலாம் என உத்தரவிட்டனர். இதனையடுத்து தமிழகம் முழுவதும் திரையரங்குகள் திறக்கப்பட்டது.

ஆனால் கடந்த 2 மாதங்களாக புதிய படம் வெளியாகவில்லை, பழைய படம் மட்டுமே திரையரங்குகளில் ஓடியதை பார்த்து வந்தோம். இந்நிலையில், நடிகர் விஜய் நடித்த மாஸ்டர் படம் நேற்று முதல் தமிழகம் மட்டுமின்றி உலகம் முழுவதும் வெளியாகி ஓடிக்கொண்டிருக்கிறது. இத்திரைப்படத்தை பார்ப்பதற்காக ரசிகர்கள் திரையரங்கு முன்பாக குவிவதை பார்த்து வருகிறோம்.

அதே போன்று புதுச்சேரி மாநிலம், காரைக்காலில் 2 திரையரங்குகளில் மாஸ்டர் படம் வெளியாகியது. முருகராமு தியேட்டரில் காலை 6 மணிக்கு முதல் காட்சிக்காக ரசிகர்கள் திரண்டனர். ஆனால், மாஸ்டர் திரையிடப்பட்டு நிலையில், அந்த படம் பாதியிலேயே நிறுத்தப்பட்டது. இது ரசிகர்களை கொதிப்படைய செய்தது. இதனால் அவர்கள் கூச்சலிட்டனர். மேலும், நாற்காலிகள் மீது ஏறி ரகளையில் ஈடுபட்டனர்.

தொழில் நுட்பக் கோளாறு காரணமாக இந்த பிரச்னை ஏற்பட்டதாகவும் ரசிகர்கள் ரகளையில் ஈடுபட வேண்டாம் என்றும் திரையரங்கம் சார்பில் தெரிவித்தும் கேட்க மறுத்துள்ளனர். இதனையடுத்து, டிக்கெட் பணத்தை திரையரங்கம் நிர்வாகம் திருப்பி அளித்தது. இதன் பின்னரே அவர்களை அமைதியாக கலைந்து சென்றனர். இந்த சம்பவம் காரைக்காலில் பரபரப்பாக பேசப்பட்டு வருகிறது.