மோடி - ஷேக் ஹசீனா தலைமையில் இரு நாட்டு அதிகாரிகள் சந்திப்பு: ஐந்து ஒப்பந்தங்கள் கையெழுத்து!

பிரதமர் நரேந்திர மோடி நேற்று பங்களாதேஷ் பிரதமர் ஷேக் ஹசீனாவுடன் இணைப்பு, எரிசக்தி, வர்த்தகம், சுகாதாரம் மற்றும் மேம்பாட்டு ஒத்துழைப்பு போன்ற துறைகளில் அடைந்த முன்னேற்றம் குறித்து விவாதித்தார். அதைத் தொடர்ந்து இரு நாடுகளும் இருதரப்பு ஒத்துழைப்பின் பல பகுதிகளை உள்ளடக்கிய ஐந்து புரிந்துணர்வு ஒப்பந்தங்களில் கையெழுத்திட்டன.

கொரோனா வைரஸ் பாதிப்பு ஏற்பட்ட பிறகு, வெளிநாட்டிற்கான முதல் பயணமாக பங்களாதேஷுக்கு சென்றுள்ள மோடி, ஷேக் ஹசீனாவுடன் இருதரப்பு பேச்சுவார்த்தை நடத்தினார். அதைத் தொடர்ந்து தூதுக்குழு அளவிலான கூட்டம் ஒரு மணி நேரத்திற்கும் மேலாக தொடர்ந்தது.

"உறவு பலத்திலிருந்து வலிமைக்குச் செல்கிறது. சுகாதாரம், வர்த்தகம், இணைப்பு, எரிசக்தி, வளர்ச்சி ஒத்துழைப்பு மற்றும் பல துறைகளில் அடைந்த முன்னேற்றம் குறித்து பிரதமர் நரேந்திரமோடி மற்றும் பிரதமர் ஷேக் ஹசீனா விவாதித்தனர்" என்று இந்திய வெளியுறவு அமைச்சக செய்தித் தொடர்பாளர் அரிந்தம் பாகி பேச்சுவார்த்தைக்குப் பிறகு ட்வீட் செய்துள்ளார். இணைப்பு, வர்த்தகம், தகவல் தொழில்நுட்பம் மற்றும் விளையாட்டு போன்ற பகுதிகளை உள்ளடக்கிய ஐந்து புரிந்துணர்வு ஒப்பந்தங்களில் இரு தரப்பினரும் கையெழுத்திட்டனர்.

மேலும் ஒரு மனிதாபிமான நடவடிக்கையாக, பிரதமர் மோடி 109 ஆம்புலன்ஸ்களை பங்களாதேஷிற்கு வழங்கி அதற்கான சாவியை ஷேக் ஹசீனாவிடம் ஒப்படைத்தார். மேலும் 1.2 மில்லியன் கொரோனா தடுப்பூசி மருந்துகளை இந்தியாவின் பரிசாக பங்களாதேஷுக்கு வழங்கினார்.

ஹசீனா தனது தந்தை மற்றும் பங்கபந்து ஷேக் முஜிபுர் ரஹ்மானின் பிறந்த நூற்றாண்டு விழாவில் வெளியிடப்பட்ட ஒரு தங்கம் மற்றும் வெள்ளி நாணயத்தை மோடிக்கு வழங்கினார். பங்களாதேஷின் சுதந்திரத்தின் 50 வது ஆண்டு நிறைவை முன்னிட்டு வெளியிடப்பட்ட வெள்ளி நாணயத்தையும் அவர் வழங்கினார்.

பின்னர் இரு தலைவர்களும் கூட்டாக சில திட்டங்களை வீடியோ கான்பெரன்ஸ் மூலம் திறந்து வைத்தனர். ஷேக் முஜிபுர் ரஹ்மானின் நூற்றாண்டு விழா மற்றும் நாட்டின் விடுதலைப் போரின் 50 ஆண்டுகள் மட்டுமல்லாது, இருதரப்புக்கும் இடையே இராஜதந்திர உறவுகள் நிறுவப்பட்ட 50 ஆண்டுகளையும் இரு நாடுகளும் கொண்டாடுகின்றன.