மீண்டெழும் பாரதம்..! கொரோனா நெருக்கடியை தாண்டி இந்தியாவின் தொழில் உற்பத்தி 22.4 சதவீதம் வளர்ச்சி..!

கடந்த மார்ச் மாதத்தில் இந்தியாவின் தொழில் உற்பத்தி 22.4 சதவீதம் வளர்ச்சி அடைந்துள்ளது. தேசிய புள்ளியியல் அலுவலகம் வெளியிட்டுள்ள தொழில் உற்பத்தி குறியீட்டு எண் புள்ளி விவரத்தில் இத்தகவல் கூறப்பட்டுள்ளது.

தொழில்துறை உற்பத்தியின் குறியீட்டில் 77.63 சதவீதமாக இருக்கும் உற்பத்தித் துறை, மார்ச் 2021 இல் 25.8 சதவீதம் அதிகரித்துள்ளது என்று தேசிய புள்ளிவிவர அலுவலகம் புதன்கிழமை வெளியிட்ட தரவுகளில் தெரிவித்துள்ளது.

சுரங்கத் துறை உற்பத்தியும் மார்ச் மாதத்தில் 6.1 சதவீதம் வளர்ச்சியடைந்தது, அதே நேரத்தில் மின் உற்பத்தி 22.5 சதவீதம் அதிகரித்துள்ளது.

பொருளாதார நடவடிக்கைகள் மீண்டும் தொடங்கியவுடன், தொழிற்சாலை உற்பத்தி செப்டம்பர் மாதத்தில் ஒரு சதவீதம் உயர்ந்தது. தொழில் உற்பத்தி குறியீட்டு எண் அக்டோபரில் 4.5 சதவீதம் அதிகரித்தது.

நவம்பர் 2020 இல், தொழிற்சாலை உற்பத்தி 1.6 சதவீதம் சரிந்தது, 2020 டிசம்பரில் இது 2.2 சதவீத வளர்ச்சியால் மீண்டும் நேர்மறையான பாதைக்குள் நுழைந்தது. தொழில் உற்பத்தி குறியீட்டு எண் ஜனவரி மாதத்தில் 0.9 சதவீதமும், இந்த ஆண்டு பிப்ரவரியில் 3.4 சதவீதமும் சுருங்கியது.

கட்டுப்பாடுகள் படிப்படியாக தளர்த்தப்படுவதால், பொருளாதார நடவடிக்கைகளில் ஒப்பீட்டளவில் முன்னேற்றம் ஏற்பட்டுள்ளது என்று புள்ளிவிவரங்கள் மற்றும் திட்ட அமலாக்க அமைச்சகம் வெளியிட்ட அறிக்கையில் தெரிவித்துள்ளது.

உற்பத்தி துறை, சுரங்கம், மின்சாரம் ஆகிய துறைகளின் உற்பத்தியில் அதிக வளர்ச்சி ஏற்பட்டதே இந்த உயர்வுக்கு காரணம் ஆகும். கடந்த ஆண்டு இதே மார்ச் மாதத்தில் கொரோனா காரணமாக தொழில் உற்பத்தி 18.7 சதவீதம் வீழ்ச்சி அடைந்தது குறிப்பிடத்தக்கது.