ஜி.எஸ்.டி-யின் கீழ் இயற்கை எரிவாயு? பிரதமர் மோடி சூசகம்..!

பிரதமர் நரேந்திர மோடி புதன்கிழமையன்று தமிழகத்தில் முக்கிய எண்ணெய் மற்றும் எரிவாயு திட்டங்களுக்கு அடித்தளம் அமைத்தார். தமிழ்நாட்டில் என்னூர்-திருவள்ளூர்-பெங்களூரு-புதுச்சேரி-நாகப்பட்டினம்-மதுரை-தூத்துக்குடி இயற்கை எரிவாயு குழாயின் ராமநாதபுரம்-தூத்துக்குடி பிரிவை பிரதமர் மோடி திறந்து வைத்துள்ளார்.

பிரதமர் தனது உரையில், மணலியை தளமாகக் கொண்ட சென்னை பெட்ரோலியம் கார்ப்பரேஷன் லிமிடெட் நிறுவனத்தின் Desulfurization பிரிவை தேசத்திற்கு அர்ப்பணித்தார். மேலும் நாகப்பட்டினத்தில் காவிரி பேசின் சுத்திகரிப்பு நிலையத்திற்கு அடிக்கல் நாட்டினார்.

தொடக்க விழாவிற்கு பிறகு பேசிய பிரதமர், தமிழகத்திற்கு மட்டுமல்ல, முழு நாட்டிற்கும் முக்கியமான எண்ணெய் மற்றும் எரிவாயு திட்டங்களின் தொடக்கத்தை கொண்டாட நாங்கள் இங்கு வந்துள்ளோம். இந்திய ஆயில் நிறுவனத்தின் 143 கி.மீ நீளமுள்ள இயற்கை எரிவாயு குழாய் ராமநாதபுரம் முதல் தூத்துக்குடி வரை இன்று தொடங்கப்படுவது ஓ.என்.ஜி.சியின் எரிவாயு வயல்களில் இருந்து எடுக்கப்படும் எரிவாயுவை வருமானமாக மாற்றிக்கொடுக்கும்.

இது ரூ. 4,500 கோடி செலவில் உருவாக்கப்படும் ஒரு பெரிய இயற்கை எரிவாயு குழாய் திட்டத்தின் ஒரு பகுதியாகும். இது தென்னிந்தியாவில் பல பகுதிகளுக்கு பயனளிக்கும். 2019-2020 ஆம் ஆண்டில், உள்நாட்டு தேவையை பூர்த்தி செய்ய 85% க்கும் அதிகமான எண்ணெய் மற்றும் 53% எரிவாயு இறக்குமதி செய்யப்பட்டது . நான் யாரையும் விமர்சிக்க விரும்பவில்லை. ஆனால் இந்த திட்டங்களில் நாங்கள் முன்பே கவனம் செலுத்தியிருந்தால், நம் நடுத்தர வர்க்கத்திற்கு சுமை ஏற்படாது என்று நான் கூற விரும்புகிறேன்.

ராமநாதபுரம்-தூத்துக்குடி பிரிவு 143 கிலோமீட்டர் நீளமாக இருக்கும். இந்த திட்டத்தின் மதிப்பு சுமார் 700 கோடி ரூபாய். எண்ணெய் மற்றும் இயற்கை எரிவாயு ஆணையம் (ஓ.என்.ஜி.சி) எரிவாயு துறைகளில் இருந்து எரிவாயுவைப் பயன்படுத்துவதற்கும், இயற்கை எரிவாயுவை தொழில்கள் மற்றும் பிற வணிக பயனர்களுக்கு கிடைக்கச் செய்வதற்கும் இந்த திட்டம் உதவும். பெட்ரோல் சல்பர் இல்லாத அலகு அமைப்பதற்கு சுமார் 500 கோடி ரூபாய் செலவாகியுள்ளது என்று பிரதமர் தெரிவித்துள்ளார்.

காவேரி பேசின் சுத்திகரிப்பு நிலையம்

காவேரி பேசின் சுத்திகரிப்பு நிலையம் உமிழ்வைக் குறைக்க உதவும் மற்றும் தூய்மையான சூழலுக்கு பங்களிக்கும். நாகப்பட்டினத்தில் அமைக்கப்படவுள்ள காவேரி பேசின் சுத்திகரிப்பு நிலையம், ஆண்டுக்கு 90 லட்சம் மெட்ரிக் டன் திறன் கொண்டதாக இருக்கும். இந்தியன் ஆயில் கார்ப்பரேஷன் லிமிடெட் (ஐ.ஓ.சி.எல்) மற்றும் சென்னை பெட்ரோலியம் கார்ப்பரேஷன் லிமிடெட் (சி.பி.சி.எல்) ஆகியவற்றின் கூட்டு முயற்சி மூலம் ரூ. 31,500 கோடி செலவில் இது அமைக்கப்படும்.

இது BS-VI தரத்தை பூர்த்தி செய்யும் மோட்டார் ஸ்பிரிட்கள் மற்றும் டீசல் மற்றும் மதிப்பு சேர்க்கப்பட்ட தயாரிப்பாக பாலிப்ரொப்பிலீன் ஆகியவற்றை உருவாக்கும்.

பிரதமர் அலுவலக கருத்துப்படி, இந்த திட்டங்களின் தொடக்கமானது மாநிலத்திற்கு சமூக மற்றும் பொருளாதார நன்மைகளை வழங்கும். கூடுதலாக, நாடு ஆற்றல் தன்னிறைவு நோக்கி நகரும். இந்த நிகழ்வில் வீடியோ கான்பரன்சிங் மூலம் தமிழக ஆளுநர் பன்வரிலால் புரோஹித், முதல்வர் பழனிசாமி, பெட்ரோலிய அமைச்சர் தர்மேந்திர பிரதான் ஆகியோர் கலந்து கொண்டனர்.

இயற்கை எரிவாயுவை ஜி.எஸ்.டி கீழ் கொண்டுவர முயற்சி

அடுத்த ஐந்து ஆண்டுகளில் எண்ணெய் மற்றும் எரிவாயு உள்கட்டமைப்பை உருவாக்க ரூ .7.5 லட்சம் கோடி செலவிட திட்டமிட்டுள்ளோம். விரிவாக்கத்திற்கு முக்கியத்துவம் கொடுக்கப்பட்டுள்ளது. சுமார் 65.2 மில்லியன் டன் பெட்ரோலிய பொருட்கள் ஏற்றுமதி செய்யப்பட்டுள்ளன. இந்த எண்ணிக்கை மேலும் உயரும் என்று எதிர்பார்க்கப்படுகிறது. தரமான எண்ணெய் மற்றும் எரிவாயு சொத்துக்களை கையகப்படுத்துவதில் எங்கள் நிறுவனங்கள் வெளிநாடுகளில் களமிறங்கியுள்ளன. ஜி.எஸ்.டி கீழ் இயற்கை எரிவாயு கொண்டு வர முயற்சி எடுக்கப்படும் என பிரதமர் தெரிவித்துள்ளார்.