மம்தா பானர்ஜி அரசை எதிர்த்து போராடிய மாணவர் படுகொலை - நள்ளிரவில் மாடியில் கேட்ட அலறல் சத்தம்!

மம்தா பானர்ஜி அரசுக்கு எதிராக 130 நாட்களாக போராட்டம் நடத்தி வந்த மாணவர் அனிஷ் கான், ஹவுராவில் படுகொலை செய்யப்பட்டார். அனிஷ் கானின் கொலை, மேற்கு வங்க அரசுக்கு எதிராக மாணவர்களின் பெரும் எதிர்ப்பைத் தூண்டியுள்ளது.

அறிக்கைகளின்படி , இந்திய மதச்சார்பற்ற முன்னணியின் தீவிர இஸ்லாமிய அமைப்பின் மாணவர் தலைவரான அனிஷ் கான், ஹவுரா மாவட்டத்தில் உள்ள அம்தாவில் சனிக்கிழமை அதிகாலை அடையாளம் தெரியாத நான்கு நபர்களால் கொல்லப்பட்டார்.

குற்றம் சாட்டப்பட்டவர்களில் ஒருவர் போலீஸ் சீருடை அணிந்து துப்பாக்கியை ஏந்தியிருந்ததாகவும், மற்றவர்கள் சிவில் தன்னார்வத் தொண்டர்களின் சீருடைகளை அணிந்திருந்ததாகவும் உயிரிழந்த 28 வயதுடைய மாணவரின் குடும்பம் தெரிவித்துள்ளது. பாதிக்கப்பட்ட அனிஷ் கான் இரண்டாவது மாடியில் இருந்து தூக்கி வீசப்பட்டதாக குடும்பத்தினர் குற்றம் சாட்டினர்.

"நள்ளிரவு 12:30 மணியளவில் நான்கு பேர் எங்கள் வீட்டிற்கு வந்து, தங்களை ஆம்டா காவல் நிலையத்தைச் சேர்ந்த காவலர்கள் என்று அடையாளம் காட்டினார்கள். அவர்களில் ஒருவர் என்னுடன் தரை தளத்தில் நின்றார். துப்பாக்கி ஏந்தியிருந்தார். மற்ற மூவரும் என் மகனை மாடிக்கு அழைத்துச் சென்றனர். சிறிது நேரம் கழித்து, நான் ஒரு பெரிய சத்தத்தை கேட்டேன். என் மகன் இரத்த வெள்ளத்தில் கிடந்ததைக் கண்டேன். நான் சத்தம் எழுப்பியதால், நான்கு பேரும் தப்பி ஓடிவிட்டனர்" என்று அனிஷ் கானின் தந்தை சலேம் கான் கூறினார்.

இருப்பினும், உள்ளூர் போலீசார் குற்றச்சாட்டுகளை நிராகரித்து, எந்த ஒரு போலீஸ்காரரும் எந்த விதமான விசாரணைக்கும் அனுப்பப்படவில்லை என்று கூறினர். அவர்கள் சடலத்தை பிரேத பரிசோதனைக்கு அனுப்பி வைத்துள்ளனர். "நாங்கள் கொலை வழக்கைத் தொடங்கியுள்ளோம். அவரது வீட்டுக்கு போலீசார் யாரும் செல்லவில்லை. விசாரணை நடந்து வருகிறது" என்று மூத்த போலீஸ் அதிகாரி ஒருவர் தெரிவித்தார்.

மம்தா பானர்ஜி தலைமையிலான அரசுக்கு எதிராக போராட்டங்கள் வெடித்தன

மாணவர் ஒருவரின் சந்தேக மரணத்தைத் தொடர்ந்து, அலியா பல்கலைக்கழக மாணவர்கள் சனிக்கிழமையன்று கொல்கத்தாவில் வீதிகளில் போராட்டத்தில் இறங்கினர். மெழுகுவர்த்தி ஏந்தி ஊர்வலமும் நடத்தினர்.

போலீசார் சம்பவ இடத்துக்கு வந்து போராட்டத்தில் ஈடுபட்டவர்களை அமைதிப்படுத்த முயன்றனர். எனினும், குற்றவாளிகளை உடனடியாக கைது செய்ய வேண்டும் என போராட்டத்தில் ஈடுபட்டவர்கள் வலியுறுத்தினர். போராட்டக்காரர்கள் போலீசார் போட்டிருந்த தடுப்புகளை நகர்த்த முயன்றதால் போராட்டம் வன்முறையாக மாறியது. இச்சம்பவம் குறித்து பதிலளித்துள்ள மேற்கு வங்க அமைச்சர் ஃபிர்ஹாத் ஹக்கீம், இந்த கொலைக்கு பின்னணியில் சதி இருக்க வாய்ப்பு இருப்பதாக கூறினார்.