உத்தர பிரதேசத்தில் உள்ள காப்பகத்தில் ஐந்து கர்ப்பிணிகள் உள்பட 57 சிறுமிகளுக்கு கொரோனா!

உத்தரபிரதேச மாநிலத்தில் உள்ள கான்பூர் மாவட்டத்தில் இருக்கும் அரசு காப்பகத்தில் 57 சிறுமிகள் கொரோனாவால் பாதிக்கப்பட்டு உள்ளனர். அதில் 5 சிறுமிகள் கர்ப்பமாக உள்ளனர். இந்தச் செய்தி உபியில் பெரும் அதிர்ச்சியை உண்டாக்கியுள்ளது.

சீனாவில் இருந்து பரவிய கொரோனா வைரஸ் தற்போது இந்தியாவிலும் வேகமாக பரவி வருகிறது. இந்த வைரஸால் இதுவரை 4 லட்சத்துக்கும் மேற்பட்டோர் பாதிக்கப்பட்டுள்ளனர் மற்றும் 13 ஆயிரத்துக்கும் அதிகமானோர் உயிரிழந்துள்ளனர்.

தற்போது உத்தரப்பிரதேச மாநிலத்தில் உள்ள கான்பூரில் இருக்கும் அரசு காப்பகத்தில் 57 சிறுமிகள் கொரோனாவால் பாதிக்கப் பட்டுள்ளனர். அதில் 5 சிறுமிகள் கர்ப்பமாக இருப்பது அதிர்ச்சியை ஏற்படுத்தியுள்ளது. மேலும், இன்னும் இரண்டு சிறுமிகள் கர்ப்பமாக இருக்கின்றனர். ஆனால், அவர்களுக்கு கொரோனா பாதிப்பு இல்லை என மாவட்ட நிர்வாக அதிகாரி தெரிவித்துள்ளார்.

இதனைப் பற்றிய கான்பூர் மாவட்டம் மேஜிஸ்ட்ரேட் பிரம்ம தேவ் ராம் கூறியது: "கொரோனாவால் பாதிக்கப்பட்ட 5 கர்ப்பிணி சிறுமிகள் ஆக்ரா, ஃபெரோஸாபாத் ஆகிய பல மாவட்டத்தில் இருந்து குழந்தைகள் நல கமிட்டி பரிந்துரைத்து போக்சோ சட்டத்தில் கீழ் அழைத்து வந்தனர். பிற இரண்டு கர்ப்பிணி சிறுமிகளுக்கு பாதிப்பில்லை. இவர்கள் 7 பேரும் அங்கிருந்து வரும் பொழுதே கர்ப்பமாக இருந்துள்ளனர். அந்த ஐந்து சிறுமிகளுக்கு மருத்துவமனையில் அனுமதிக்கப்பட்டு சிகிச்சை அளிக்கப்பட்டு வருகிறது."

இவ்வாறு அவர் கூறினார்.