காலை சட்டப்பேரவைக் கூட்டம், மாலை அண்ணா அறிவாலயம் விசிட் - பரபர தி.மு.க எம்.எல்.ஏ-ஏக்கள்!

அரசு தலைமை கொறடா கோவி.செழியன் வெளியிட்டுள்ள செய்திக்குறிப்பில், "முதல்வர் மு.க.ஸ்டாலின் தலைமையில், திமுக சட்டப்பேரவை உறுப்பினர்கள் கூட்டம் 21-06-2021 திங்கட்கிழமை மாலை 5 மணியளவில் சென்னை, அண்ணா அறிவாலயம், 'கலைஞர் அரங்கில்' நடைபெறும்.

அதுபோது திமுக சட்டப்பேரவை உறுப்பினர்கள் அனைவரும் தவறாது கலந்து கொள்ளுமாறு கேட்டுக் கொள்கிறேன்" எனத் தெரிவித்துள்ளார்.

வருகிற 21-ஆம் தேதி காலை 10 மணிக்கு தமிழக சட்டப்பேரவைக் கூட்டம் கூடுகிறது. அன்றைய தினமே மாலை 5 மணியளவில் தி.மு.க எம்.எல்.ஏ-ஏக்கள் கூட்டம் நடைபெறும் என அறிவிக்கப்பட்டுள்ளது.

இந்தக் கூட்டத்தில் சட்டப்பேரவையில் எம்.எல்.ஏ-ஏக்கள் எவ்வாறு செயல்பட வேண்டும், சட்டப்பேரவைக் கூட்டத்தில் விவாதிக்கப்பட வேண்டிய முக்கியப் பிரச்சினைகள் பற்றி ஆலோசிக்கப்படவுள்ளது.

தமிழக முதல்வராக மு.க.ஸ்டாலின் கடந்த மே மாதம் 7-ஆம் தேதி பதவியேற்றுக் கொண்டார். இதைத் தொடர்ந்து தமிழக சட்டப்பேரவைக் கூட்டம் கடந்த மே மாதம் 11 மற்றும் 12-ஆம் தேதி நடைபெற்றது.

11-ஆம் தேதி நடைபெற்ற கூட்டத்தில் எம்.எல்.ஏ-ஏக்கள் பதவியேற்றுக் கொண்டனர். 12-ஆம் தேதி சபாநாயகர் மற்றும் துணை சபாநாயகர் தேர்தல் நடைபெற்றது குறிப்பிடத்தக்கது.