காலை 7 மணிக்கு தொடங்கி இரவு 7 மணிவரை வாக்குப்பதிவு.. தமிழக தேர்தல் அதிகாரி தகவல்.!

தமிழக சட்டமன்ற தேர்தல் அடுத்த மாதம் 6ம் தேதி (ஏப்ரல்) நடைபெறுகிறது. இதற்காக அரசியல் கட்சிகளின் பிரச்சாரம் களை கட்டத்தொடங்கியுள்ளது.

இதனிடையே தலைமைச் செயலகத்தில் செய்தியாளர்களுக்கு தமிழக தேர்தல் அதிகாரி சத்யபிரத சாகு அளித்துள்ள பேட்டியில்: சட்டமன்ற தேர்தலில் போட்டியிடுவதற்கு 7 ஆயிரத்து 255 வேட்புமனுக்கள் தாக்கல் செய்யப்பட்டுள்ளது. அதில் 2 ஆயிரத்து 727 மனுக்கள் நிராகரிக்கப்பட்டுள்ளது.

அதில் 4 ஆயிரத்து 512 மனுக்கள் ஏற்றுக்கொள்ளப்பட்டுள்ளன. (நேற்று 6.30 மணி நிலவரப்படி 215 மனுக்கள் திரும்பப் பெறப்பட்டன). தமிழகத்தில் 6 கோடியே 29 லட்சத்து 43 ஆயிரத்து 512 வாக்காளர்கள் உள்ளனர். இவர்களில் ஆண்கள் 3 கோடியே 9 லட்சத்து 95 ஆயிரத்து 440 பேர், பெண்கள் 3 கோடியே 19 லட்சத்து 40 ஆயிரத்து 880 பேர். 7 ஆயிரத்து 192 பேர் மூன்றாம் பாலினத்தவர்.

இதனிடையே வாக்காளர்களுக்கு பணம் பட்டுவாடா செய்யப்படுவதை தடுக்கும் விதமாக தேர்தல் பறக்கும் படையினர் தீவிர சோதனையில் ஈடுப்பட்டு வருகின்றனர்.

மேலும், சட்டமன்ற தேர்தல் வாக்குப்பதிவு காலை 7 மணிக்கு தொடங்கி இரவு 7 மணி வரை நீடிக்கும். எனவே வாக்காளர்கள் சமூக இடைவெளியை கடைப்பிடித்து வாக்களிக்கலாம். இவ்வாறு அவர் அளித்துள்ள பேட்டியில் கூறப்பட்டுள்ளது.