யாருக்கு அதிக திரைகள்? யாருக்கு கலெக்ஷன் அதிகம்? - 'துணிவு' or 'வாரிசு'

இந்த ஆண்டின் பொங்கல் பண்டிகைக்கு தமிழ் திரையுலகில் இரண்டு பெரிய படங்கள் மட்டுமே வெளியாகின்றன. ஒன்று அஜித் நடித்துள்ள 'துணிவு' மற்றொன்று விஜய் நடித்துள்ள 'வாரிசு'.

இயக்குனர் ஹச் வினோத் இயக்கத்தில் போனிகபூர் தயாரிப்பில் மூன்றாவது முறையாக நடிகர் அஜித் இணைந்துள்ள திரைப்படம் 'துணிவு' பேங்க் கொள்ளையை மையப்படுத்தி உருவாகும் ஆக்ஷன் கதையில் அஜித் நடித்துள்ளதால் படத்தின் மீதான எதிர்பார்ப்பு ரசிகர்கள் மத்தியில் பெரும் அளவில் உள்ளது.

இயக்குனர் வம்சி பைடிப்பள்ளி இயக்கத்தில். தில் ராஜு தயாரிப்பில் முதன்முறையாக விஜய் தமிழ் மற்றும் தெலுங்கில் நேரடியாக நடித்துள்ள படம் 'வாரிசு'. தெலுங்கு சினிமா பாணியில் குடும்ப பின்னணியை கொண்ட இப்படம் விஜய் ரசிகர்களையும் குடும்ப ரசிகர்களையும் கவரும் எனவும் பெரிதும் எதிர்பார்க்கப்பட்டு வருகிறது.

இந்த நிலையில் 9 ஆண்டுகளுக்குப் பிறகு அஜித், விஜய் படங்கள் நேரடியாக மோதுகின்றன. குறிப்பாக 2014 ஆம் ஆண்டு ஜில்லா, வீரம் ஆகிய இரண்டு படங்களும் நேரடியாக மோதியது. தற்பொழுது ஒன்பது ஆண்டுகளுக்குப் பிறகு இரு படங்களின் நடிகர்களின் படங்கள் மார்க்கெட் வளர்ச்சி கிட்டத்தட்ட 10 மடங்காக உயர்ந்துள்ள நிலையில் தற்போது மீண்டும் தல-தளபதி ஆகிய இருவரின் படங்கள் மோதுவதால் துணிவா-வாரிசா என சமூக வலைதளம் முதல் திரையரங்குகள் வரை ரசிகர்கள் சளைக்காமல் மோதி வருகின்றனர்.

இந்த நிலையில் வாரிசு படத்தை விட துணிவு படத்திற்கு தான் தமிழ்நாட்டில் அதிக திரையரங்கங்கள் ஒதுக்கப்பட்டதாக சர்ச்சை எழுந்துள்ளது. அதற்கு காரணமாக கூறப்படுவது என்னவென்றால் முதல்வரின் மகனும், அமைச்சருமான உதயநிதி ஸ்டாலினின் 'ரெட் ஜெயண்ட் மூவிஸ்' நிறுவனம் 'துணிவு' படத்தை வெளியிடுவதால் அவரது கட்டுப்பாட்டில் உள்ள அதிக திரையரங்குகளில் துணிவு படத்தை வெளியிட வேண்டும் என்ற எழுதப்படாத விதியாக இருப்பதாக சொல்லப்படுகிறது.

இதன் காரணமாக 'துணிவு' படம் அதிக திரையரங்குகளில் வெளியிடப்படும் என தகவல்கள் வெளியாகி வந்தன. வாரிசு படத்தின் தயாரிப்பாளரான தில்ராஜூ கூட தமிழகத்தில் நம்பர் ஒன் நடிகர் விஜய் என்பதால் அவரது திரைப்படத்திற்கு கூடுதல் திரையரங்க காட்சிகள் ஒதுக்க வேண்டும் என கூறியிருந்தார்.

மறைமுகமாக துணிவு படத்திற்கு அதிக திரைகள் ஒதுக்கப்பட்டதாக அவர் தெரிவித்ததாக கருத்தும் கூறப்பட்டது. இந்த நிலையில் துணிவு படத்தை வெளியிடும் 'ரெட் ஜெயண்ட் மூவிஸ்' நிறுவனத்திடம் 'வாரிசு' படத்தின் தமிழகத்தின் முக்கிய ஏரியா சிலவற்றை விற்பனை செய்த காரணத்தினால் மட்டுமே 'வாரிசு' படத்திற்கு ஒதுக்கப்பட்ட திரைகளின் எண்ணிக்கை சற்று அதிகரித்துள்ளதாக திரையுலகத்தில் பேச்சு அடிபடுகிறது.

'துணிவு' படத்தின் டிரைலர் வெளியான 24 மணி நேரத்தில் 24.96 மில்லியன் பார்வையாளர்களை கடந்தது, வாரிசு படத்தின் ட்ரைலர் வெளியான 24 மணி நேரத்தில் 23.05 மில்லியன் பார்வையாளர்கள் கடைந்தது அதாவது 'வாரிசு' படத்தை விட 'துணிவு' படத்திற்க்கே அதிகமான பார்வையாளர்கள் ஆதரவு கிடைத்தது.

தமிழகத்தில் மொத்தம் 9 விநியோகப் பகுதிகள் உள்ளன 9 ஏரியாக்களில் 4 பகுதிகளில் திருச்சி, சேலம், மதுரை மற்றும் நெல்லை 'வாரிசு' படத்தின் உரிமை அதாவது எம்.ஜி (குறைந்தபட்ச உத்தரவாதம்) எம் ஜி அடிப்படையில் உள்ளூர் விநியோகஸ்தர்களுக்கு விற்கப்பட்டுள்ளது. மீதமுள்ள சென்னை நகரம், செங்கல்பட்டு, கோயமுத்தூர், வட ஆற்காடு மற்றும் தென் ஆற்காடு ஆகிய 5 பகுதிகளுக்கு 'துணிவு' படத்திற்கு அதிக திரைகள் ஒதுக்கப்பட்டுள்ளன என திரையரங்கு தரப்பு தகவல்கள் தெரிவிக்கின்றன.

குறிப்பாக சென்னை மாநகரிலுள்ள முக்கிய திரையரங்குகளில் இரண்டு படங்களுக்கும் சம முக்கியத்துவம் கொடுத்துள்ளதாக தகவல்கள் வெளியாகி உள்ளது. ஆனால் சென்னையைச் சுற்றி உள்ள பெரு நகரங்களில் அறியப்படாத திரையரங்குகளில் 'வாரிசு' திரைப்படத்தை விட துணிவுக்கு தான் அதிக திரை ஒதுக்கப்பட்டுள்ளது.

மேலும் தமிழகத்தின் பிற பகுதிகளான தஞ்சாவூர், திருவாரூர், நாகப்பட்டினம், புதுக்கோட்டை, சிவகங்கை, காரைக்குடி, கடலூர் இது போன்ற பகுதிகளில் வாரிசு படத்தை விட 'துணிவு' படத்திற்கு தான் அதிக திரையரங்குகள் ஒதுக்கப்பட்டுள்ளன.

இந்த நிலையில் 'துணிவு' படம் அதிக திரைகளில் வெளியாவதாகவும் அந்த படம் தான் அதிக கலெக்ஷனை பெறும் என எதிர்பார்க்கப்பட்டு வருகிறது. இரண்டு படத்தில் எந்த படம் அதிக திரையரங்கில் வெளியாவது என்ற ஆர்வம் ரசிகர்களிடையே தற்பொழுது போட்டியாகவே உயர்ந்துள்ளது.

ரசிகர்கள் மத்தியில் 'துணிவு' படம் அஜித் நெகட்டிவ் கதாபாத்திரத்தில் நடிக்கும் கதைக்களம் என்பதால் வழக்கமாக வரும் வசூலை விட துணிவு பணத்திற்கு சற்று கூடுதலாகவே கிடைக்கும் என தரவுகள் தெரிவிக்கின்றன. அதே நிலையில் குடும்ப பின்னணி கதை களத்தில் கொண்ட படம் என்பதால் முதலில் துவங்கும் 'வாரிசு' பட காட்சிகளுக்கு பெரிதாக வரவேற்பு இருக்காது எனவும் பிற்பகுதியிலேயே அதற்கான வரவேற்பு இருக்கும் எனவும் தெரிகிறது. இரு படங்களையும் வெளியிட்டு நிலையை ஒப்பிட்டுப் பார்த்தால் முதலில் அதிக கலெக்ஷனை எடுக்க போவது தற்போதைய நிலவரப்படி 'துணிவு' படம் என்றே தெரிகிறது. குடும்பப் பின்னணியை கொண்ட கதை என்பதால் தொடர் விடுமுறை காரணமாக வாரிசு திரைப்படத்திற்கு கலெக்ஷன் அதிகரிக்க சில ஷோக்கள் சென்ற பிறகே அதிகமாகும் எனவும் தெரிகிறது.