இங்கிலாந்து அணிக்கு எதிரான டி-20 தொடருக்கான இந்திய அணி அறிவிப்பு.!

இந்தியா வந்துள்ள இங்கிலாந்து கிரிக்கெட் அணி, இந்திய அணியுடன் நான்கு டெஸ்ட் போட்டிகள், ஐந்து டி.20 போட்டிகள் மற்றும் மூன்று ஒருநாள் போட்டிகள் கொண்ட தொடரில் பங்கேற்றுள்ளது.இதில் முதலில் நடைபெற்று வரும் டெஸ்ட் தொடரில் இதுவரை 2 போட்டிகள் நிறைவடைந்துள்ளன.

மூன்றாவது டெஸ்ட் போட்டி 24ம் தேதி துவங்கி 28ம் தேதியும், கடைசி டெஸ்ட் போட்டி மார்ச் 4ம் தேதி துவங்கி 8ம் தேதியும் நிறைவடைய உள்ளது. இதன்பிறகு இரு அணிகள் இடையேயான ஐந்து டி.20 போட்டிகள் கொண்ட தொடர் துவங்க உள்ளது, இந்த தொடரின் முதல் போட்டி மார்ச் 12ம் தேதி அஹமதாபாத்தில் நடைபெற உள்ளது.இந்தநிலையில், இங்கிலாந்து அணியுடனான டி.20 தொடருக்கான இந்திய அணியை பிசிசிஐ இன்று அறிவித்துள்ளது.

இந்த தொடருக்கான இந்திய அணியில் பலரும் ஆச்சரியப்படும் விதமாக சூர்யகுமார் யாதவிற்கு இடம் கிடைத்துள்ளது. அதே போல் தமிழகத்தை சேர்ந்த நடராஜன், வருண் சக்கரவர்த்தி ஆகியோருக்கும், ஐபிஎல் தொடரில் மாஸ் காட்டிய ஆல் ரவுண்டர் ராகுல் திவாடியாவிற்கும் இந்திய அணியில் இடம் கிடைத்துள்ளது.

அதேபோல் காயம் காரணமாக அவதிப்பட்டு வந்த புவனேஷ்வர் குமார் இந்திய அணியில் மீண்டும் இடம்பிடித்துள்ளார். இந்திய அணியின் இரண்டாவது விக்கெட் கீப்பராக இளம் வீரர் இஷான் கிஷன் சேர்க்கப்பட்டுள்ளார். இதுதவரி வழக்கமான அனைத்து வீரர்களும் இங்கிலாந்து அணியுடனான டி.20 தொடருக்கான இந்திய அணியில் இடம்பிடித்துள்ளனர்.

விராட் கோலி (கேப்டன்), ரோஹித் சர்மா (துணை கேப்டன்), கே.எல் ராகுல், ஷிகர் தவான், ஸ்ரேயஸ் ஐயர், சூர்யகுமார் யாதவ், ஹர்திக் பாண்டியா, ரிஷப் பண்ட் (விக்கெட் கீப்பர்), இஷான் கிஷன்( விக்கெட் கீப்பர்), யுஸ்வேந்திர சாஹல், வருண் சக்கரவர்த்தி, அக்‌ஷர் பட்டேல், வாசிங்டன் சுந்தர், ராகுல் திவாடியா, நடராஜன், புவனேஷ்வர் குமார், தீபக் சாஹர், நவ்தீப் சைனி, ஷர்துல் தாகூர்.