புஜாரா துவக்க வீரரா - புதிய ஆலோசனை கூறும் மஞ்ச்ரேக்கர்!

ஆஸ்திரேலியா சென்றுள்ள இந்திய கிரிக்கெட் அணி, ஆஸ்திரேலிய அணியுடன் நான்கு டெஸ்ட் போட்டிகள் கொண்ட தொடரில் பங்கேற்றுள்ளது. இந்த தொடரின் முதல் போட்டி ஆஸ்திரேலியாவின் அடிலெய்ட் மைதானத்தில் நடைபெற்றது.

இந்த போட்டியில் 56 ரன்கள் முன்னிலையுடன் இரண்டாவது இன்னிங்ஸை துவங்கிய இந்திய அணி, வெறும் 36 ரன்களுக்கே அனைத்து விக்கெட்டுகளையும் பறிகொடுத்து மிகப்பெரும் அசிங்கத்தை சந்தித்தது. இந்திய பேட்ஸ்மேன்களின் பொறுப்பற்ற ஆட்டத்தினாலும், ஆஸ்திரேலிய பந்துவீச்சாளர்களின் அபார பந்துவீச்சினாலும் முதல் போட்டியில் 8 விக்கெட் வித்தியாசத்தில் ஆஸ்திரேலிய அணி அபார வெற்றியும் பெற்றது.

இரு அணிகள் இடையேயான இரண்டாவது டெஸ்ட் போட்டி அடுத்த சில தினங்களில் துவங்க உள்ள நிலையில், முன்னாள் வீரர்கள், கிரிக்கெட் வல்லுநர்கள் பலர் இந்திய அணி தோல்வியில் இருந்து மீண்டு வருவதற்கு தேவையான தங்களது ஆலோசனைகளை தொடர்ந்து கூறி வருகின்றனர்.

அதே போல் முதல் போட்டியில் மிக மோசமாக விளையாடிய இளம் வீரர் ப்ரித்வி ஷாவை அணியில் இருந்து நீக்கிவிட்டு அவருக்கு பதிலாக யாரை துவக்க வீரராக களமிறக்க வேண்டும் என்றும் முன்னாள் வீரர்கள் பலர் தொடர்ந்து தங்களது கருத்துக்களை தெரிவித்து வருகின்றனர். அந்தவகையில், இது குறித்து பேசியுள்ள முன்னாள் வீரர் சஞ்சய் மஞ்ச்ரேக்கர், இரண்டாவது டெஸ்ட் போட்டியில் புஜாராவை துவக்க வீரராக களமிறக்க வேண்டும் என்று தெரிவித்துள்ளார்.

இது குறித்து சஞ்சய் மஞ்ச்ரேக்கர் தனது ட்விட்டர் பக்கத்தில் பதிவிட்டுள்ள ட்வீட்டில், “நான் மூன்றாவது இடத்தில் தான் விளையாடியுள்ளேன். என்னை பொறுத்தவரையில் ஆஸ்திரேலிய அணியுடனான இரண்டாவது டெஸ்ட் போட்டியில் புஜாராவை துவக்க வீரராக களமிறக்கலாம், நீண்ட நேரம் நிலைத்து நின்று விளையாட கூடியவரான புஜாராவும் போட்டியின் துவக்கத்தில் இருந்தே பந்துவீச்சாளர்களை கணிக்க இலகுவாக இருக்கும், அதே போல் விரைவாக விக்கெட் இழப்பதில் இருந்தும் தப்பிக்கலாம்” என்று தெரிவித்துள்ளார்.