மத்திய அரசின் பாணியில் டிஜிட்டல் மயம்: ஆளில்லா விமான சேவை அமைப்பை நிறுவ ஒப்புதல் அளித்த தமிழக அரசு!

அண்ணா பல்கலைக்கழகத்தின் மெட்ராஸ் இன்ஸ்டிடியூட் ஆப் டெக்னாலஜியுடன் இணைந்து Unmanned Aerial Vehicles Corporation (UAVC)நிறுவுவதற்கு தமிழக அரசு ஒப்புதல் அளித்துள்ளது.

தமிழ்நாடு மற்றும் பிற மாநிலங்களில் உள்ள அரசு நிறுவனங்களுக்கு பல்வேறு நோக்கங்களுக்காக UAV களை இயக்குவதற்கு இந்த நிறுவனம் உதவும். UAVC என்பது 100 சதவீதம் அரசுக்கு சொந்தமான தனியாரால் வரையறுக்கப்பட்ட நிறுவனமாகும். கார்ப்பரேஷனின் அங்கீகரிக்கப்பட்ட பங்கு மூலதனம் ரூ.10 கோடியாகவும், செலுத்தப்பட்ட மூலதனம் ரூ.9 கோடியாகவும் இருக்கும். இயக்குநர்கள் குழுவிற்கு உயர்கல்வித்துறை செயலாளர் டி கார்த்திகேயன் தலைமை தாங்குவார்.

இதன் முக்கிய நோக்கங்கள்:

மல்டி-மிஷன் வான்வழி ட்ரோன்கள், ஆளில்லா வான்வழி அமைப்புகள், எலக்ட்ரிக்கல் மினி ஏர்போர்ன் ட்ரோன், மினி பெட்ரோல் வான்வழி ட்ரோன், பதிவு நடவடிக்கைகளுக்கான மினி பெட்ரோல் வான்வழி ட்ரோன் உட்பட அனைத்து வகையான ட்ரோன்கள் மற்றும் அதனுடன் தொடர்புடைய அமைப்புகளை வடிவமைத்தல், உற்பத்தி செய்தல் மற்றும் வர்த்தகம் செய்தல், தேடல் மற்றும் மீட்பு நடவடிக்கைகளுக்கான ஆளில்லா வான்வழி வாகனம் ஆகியவற்றின் செயல்பாட்டை முறைப்படுத்தும்.

ட்ரோன் தயாரிப்பு, வான்வழி புகைப்படம் எடுத்தல், வான்வழிப் படங்கள், டிஜிட்டல் புகைப்படம் எடுத்தல், ரியல் எஸ்டேட் படப்பிடிப்பிற்கான வான்வழிப் படமெடுத்தல் மற்றும் ஒளிப்பதிவு, கட்டுமானத் தளப் படமெடுத்தல், மேப்பிங் மற்றும் 360 டிகிரி மெய்நிகர் சுற்றுப்பயணங்கள் மற்றும் கணக்கெடுப்பு ஆகியவற்றுக்கான அனைத்து வகையான சேவைகளையும் UAVC வழங்கும்.

அண்ணா பல்கலைக்கழகத்தின் எம்ஐடி வளாகத்தில் உள்ள டாக்டர் கலாம் மேம்பட்ட யுஏவி ஆராய்ச்சி மையம், சமூக பயன்பாடுகளுக்காக ஆளில்லா விமானங்களின் வடிவமைப்பு மற்றும் மேம்பாடு குறித்த திட்டத்தை முன்னெடுத்து வருவதாக அரசு ஆணை தெரிவித்துள்ளது.