சீன கைபேசிகளை சமாளிக்க களமிறங்கும் இந்திய ஸ்மார்ட்போன் நிறுவனங்கள் - சபாஷ் சரியான போட்டி!

கால்வான் பள்ளத்தாக்கில் இந்திய ராணுவ வீரர்கள் 20 பேர் வீர மரணமடைந்ததை அடுத்து, சீனப் பொருட்களை புறக்கணிக்க வேண்டும் என்ற சீன - எதிர்ப்பு மன நிலை நாட்டில் வலுத்து வருகிறது. இதற்கு மத்தியில், இந்திய ஸ்மார்ட்போன் நிறுவனங்கள் சந்தைகளில் மறுபிரவேசம் செய்யப் போவதாக, எக்னாமிக்ஸ் டைம்ஸ் தெரிவித்துள்ளது.

வரும் தகவல்களின் படி, உள்நாட்டு மொபைல் போன் தயாரிப்பாளர்களான மைக்ரோமேக்ஸ், கார்பன் மற்றும் லாவா ஆகியவை கடந்த நான்கு ஆண்டுகளில் சீன பிராண்டுகளுக்கு இழந்த சந்தையை மீண்டும் கைப்பற்றும் முயற்சியில் இறங்குகின்றன. பெரும்பாலும் ₹10,000 வகைக்கு கீழ் உள்ள ஸ்மார்ட்போன்களை மீண்டும் தொடங்க உள்ளன.

கார்பன் மற்றும் லாவா ஜூலை - ஆகஸ்ட் மாதங்களில் ₹4,000 முதல் ₹7,000 பிரிவில் 3 - 4 மாடல்களை அறிமுகம் செய்யவுள்ள நிலையில், மைக்ரோமேக்ஸ் ஸ்மார்ட்போன்களின் முழு வரிசையையும் ₹7,000 முதல் ₹15,000 பிரிவில் வெளியிடும்.

தற்போது, ​​இந்திய பிராண்டுகள் ஸ்மார்ட்போன் சந்தையில், சீன பிராண்டுகளின் 81 சதவீத சந்தை பங்கை ஒப்பிடும்போது வெறும் 1 சதவீத பங்கைக் கொண்டுள்ளன.

சீனாவிற்கு எதிரான உணர்வுகள் நாட்டில் உள்ளன என்பதை ஒப்புக் கொண்ட கார்பன் மொபைல்கள் நிர்வாக இயக்குனர் பர்தீப் ஜெயின், உள்நிதியில் இருந்து ஸ்மார்ட்போன்களில் மீண்டும் நுழைவதற்கு நிறுவனம் நிதியளிக்கும் என்று கூறினார்.

எவ்வாறாயினும், லாவா இன்டர்நேஷனல் நிர்வாக இயக்குனர் ஹரி ஓம் ராய், இந்திய ஸ்மார்ட்போன் நிறுவனங்கள் சீனாவுக்கு எதிரான உணர்வுகளின் அடிப்படையில் மட்டும் இந்த பிரிவில் மீண்டும் நுழைவதை எதிர்பார்க்க முடியாது என்று கூறினார். இந்திய பிராண்டுகள் சீனர்களை விட சிறந்த தயாரிப்புகளை வழங்க வேண்டும் என்றும் அவர் கூறினார்.

"நம் நாடு சுய சார்புடையதாக இருப்பது மற்றும் நுகர்வோருக்கு அதிக மதிப்பை வழங்குவது மிகவும் முக்கியமானதாகும். மீண்டும் வெற்றி பெற ஒரு பெரிய வாய்ப்பு இருப்பதாக நாங்கள் நம்புகிறோம், "என்று ராய் மேற்கோளிட்டுள்ளார்.