துப்பாக்கி சுடும் பயிற்சியில் கலக்கும் நடிகர் அஜித்.. சமூக வலைதளங்களில் வைரலாகும் புகைப்படங்கள்.!

சென்னை, எழும்பூரில் உள்ள ரைபிள் கிளப்பில் நடிகர் அஜித்குமார் துப்பாக்கி சுடும் பயிற்சியில் தீவிரமாக ஈடுபட்டு வருகிறார்.

சினிமாவில் சூப்பர் ஸ்டார் நடிகர் ரஜினிக்கு அடுத்தபடியாக பேசப்பட்டு வருபவர் நடிகர் அஜித்குமார். இவருக்கு என்று தனி ரசிகர் பட்டாளமே உள்ளது என்று கூறலாம். இவர் திரைப்பட விழா மற்றும் விருதுகள் போன்ற நிகழ்ச்சிகளில் எதிலும் கலந்து கொள்ள மாட்டார். முக்கியமாக பத்திரிகை, தொலைக்காட்சிக்கு தலை காட்டாமல் இருந்து வருபவர் இவர் ஒருவர் மட்டுமே என்றும் சொல்லலாம்.

இந்நிலையில், கடந்த வாரம் துப்பாக்கி சுடும் பயிற்சிக்காக ஒரு கால் டாக்சியில் சென்று கொண்டிருந்தார். அப்போது அந்த டாக்சியை ஓட்டி வந்த டிரைவர் தவறுதலாக சென்னை போலீஸ் கமிஷ்னர் அலுவலகத்திற்குள் சென்று விட்டார். அப்போது அவரை சுற்றி ஏராளமான ரசிகர்கள் சூழ்ந்து கொண்டனர். அது மட்டுமின்றி காவலர்கள், ரசிகர்கள் என அனைவரும் செல்பி எடுத்துக் கொண்டனர்.

இந்நிலையில், சென்னை எழும்பூரில் உள்ள ரைபிள் கிளப்பில் துப்பாக்கி சுடும் போட்டிக்காக தீவிரமான பயிற்சியில் ஈடுபட்டு வருகிறார். இவர் கடந்த 2019ஆம் ஆண்டு கோவை மற்றும் டெல்லியில் நடைபெற்ற ரைபிள் சாம்பியன்ஸ் போட்டியில் பங்கேற்றார் என்பது குறிப்பிடத்தக்கது. இந்நிலையில், இந்தாண்டும் ரைபிள் போட்டி நடைபெற உள்ளது. இதற்காகத்தான் அவர் எழும்பூரில் பயிற்சி மேற்கொண்டு வருகிறார் என்பது குறிப்பிடத்தக்கது.