சீனாவுக்கு மூக்கு வியர்க்க ஆரம்பிச்சாச்சு! எண்ணை கிடங்கு நம்ம கண்ட்ரோல்: துயரத்தில் தவிக்கும் இலங்கையை தூக்கி விடும் இந்தியா!

இலங்கையில் திருகோணமலை அருகே அமைந்துள்ள, இரண்டாம் உலகப் போரின் போது பயன்படுத்தப்பட்ட எண்ணெய் தாங்கி அமைப்பை, 50 ஆண்டுகளுக்கு குத்தகைக்கு விட, இந்தியாவுடன் புதிய ஒப்பந்தத்தில் கையெழுத்திட இலங்கை இணங்கியுள்ளதாக எரிசக்தி அமைச்சர் தெரிவித்தார்.

அமைச்சரவையின் அங்கீகாரத்தின் பின்னர் அடுத்த வாரம் இந்த ஒப்பந்தம் கைச்சாத்திடப்படும் என்றும், இந்திய எண்ணெய் நிறுவனமான LIOC இன் உள்ளூர் ஆபரேட்டர்களுடன் 2002 ஆம் ஆண்டு செய்து கொள்ளப்பட்ட ஒப்பந்தத்தின் நீட்டிப்பு இது என்றும் அமைச்சர் கூறினார்.

2002 ஆம் ஆண்டு இலங்கையானது, இரண்டாம் உலகப் போரின் போது விநியோகத் தளமாகப் பயன்படுத்தப்பட்ட எண்ணெய் சேமிப்பு வளாகத்தை பயன்படுத்திக்கொள்ள இந்தியாவுடன் ஒப்பந்தத்தில் நுழைந்தது. போர்க்கப்பல்கள் மற்றும் விமானங்களுக்கு எரிபொருள் நிரப்புவதற்காக பிரித்தானிய ஆட்சியாளர்கள் கட்டியிருந்த திருகோணமலை எண்ணெய் சேமிப்பு கிடங்கை பயன்படுத்த இந்தியா எல்லா நேரங்களிலும் தயாராக இருந்தது.

50 வருட குத்தகைக்கு 99 டாங்கிகளில் 14 தொட்டிகளை மட்டுமே LIOC கட்டுப்பாட்டில் வைத்திருக்கும் என அந்நாட்டு அமைச்சர் கம்மன்பில கூறினார். மொத்தமுள்ள 99 டாங்கிகளில் 61 டாங்கிகள் அரச எண்ணெய் நிறுவனமான சிலோன் பெட்ரோலியம் கார்ப்பரேஷன் (சிபிசி) மற்றும் எல்ஐஓசி ஆகியவற்றுக்கு இடையே உருவாக்கப்பட்ட கூட்டு நிறுவனத்தின் கீழ் இயக்கப்படும் என்றும், சிபிசி பெரும்பான்மையான 51 சதவீத பங்குகளை வைத்திருக்கும் என்றும் அவர் கூறினார். தொட்டிகளின் முழுமையான கட்டுப்பாட்டை மீளப் பெறுவதே தனது நோக்கமாக இருந்ததாக முன்னர் கூறியிருந்த கம்மன்பில, புதிய ஒப்பந்தம் "இலங்கைக்குக் கிடைத்த வெற்றி" என்று கூறினார்.

உள்ளூர்ப் பொருளாதாரத்தில் நிலவும் அந்நியச் செலாவணி நெருக்கடியால் அதிகரித்துள்ள தற்போதைய பொருளாதார துயரங்களைத் தீர்க்க இலங்கை இந்தியாவின் உதவியை நாடுவதன் பின்னணியில் அடுத்த வார ஒப்பந்தம் முறைப்படுத்தப்படும். கச்சா எண்ணெய்க்கு பணம் செலுத்த முடியாததால் இலங்கை அதன் ஒரே சுத்திகரிப்பு ஆலையை மூடிவிட்டதாகவும், எரிபொருள் வாங்குவதற்கு இந்தியாவுடன் கடன் வழங்குவது குறித்து பேச்சுவார்த்தை நடத்தி வருவதாகவும் அதிகாரிகள் தெரிவித்தனர்.