மத்திய அரசின் முதல் 100 நாள் சாதனைகள் குறித்து புதுதில்லியில் செய்தியாளர்களிடம் விளக்கிய சுகாதாரம், குடும்ப நலம் மற்றும் ரசாயன, உரங்கள் துறை அமைச்சர் ஜெ.பி.நட்டா மத்திய அரசின் பல்வேறு துறைகளிலும் 100 நாட்களில் சுமார் 15 லட்சம் கோடி ரூபாய் முதலீடு செய்யப்பட்டுள்ளது என்றார். சுகாதாரம் மற்றும் குடும்ப நலத்துறையிலும் ஏராளமான முன் முயற்சிகள் தொடங்கப்பட்டிருப்பதாக கூறிய அவர், இதன் மூலம் சுகாதார சேவை மேம்படுவதோடு இந்தியா முழுவதும் தரமான சேவைகள் கிடைக்க வழிவகை செய்யப்பட்டுள்ளதாக தெரிவித்தார்.
ஆயுஷ்மான் பாரத் பிரதமரின் ஜன் ஆரோக்கியா திட்டம்:
ஆயுஷ்மான் பாரத் பிரதமரின் ஜன் ஆரோக்கியா திட்டத்தில், 70 வயது மற்றும் அதற்கு மேற்பட்ட மூத்த குடிமக்கள் அனைவரும் அவர்களது வருவாயை கணக்கில் கொள்ளாமல் சேர்த்து கொள்ளப்படுவார்கள் என அண்மையில் அறிவிக்கப்பட்டதை சுட்டிக்காட்டிய நட்டா இதன் மூலம் 4.5 கோடி குடும்பங்களைச் சேர்ந்த 6 கோடி பேர் பயனடைவார்கள் என்றார். ஆயுஷ்மான் பாரத் திட்டம் அரசு நிதியுதவி அளிக்கும் உலகின் மிகப்பெரிய சுகாதார காப்பீட்டு திட்டமாக உள்ளது என்றும், விரிவாக்கப்பட்ட இத்திட்டம் அடுத்த மாதம் முதல் நடைமுறைக்கு வரும் என்றும் தெரிவித்தார்.
யு-வின் இணையதளம்:
யு-வின் இணையதளம் சுகாதாரத்துறையின் மற்றொரு குறிப்பிடத்தக்க முன்னேற்றம் என்பதோடு, கர்ப்பிணிப் பெண்கள் மற்றும் பிறந்த குழந்தை முதல் 17 வயது வரையிலானவர்களுக்கு செலுத்தப்படும் தடுப்பூசி குறித்த ஆவணங்களை முழுமையாக டிஜிட்டல் மயமாக்குவதற்காக உருவாக்கப்பட்டதாகும். புதிய காசநோய் சிகிச்சை & இந்தியாவில் உருவான நோய் கண்டறிதல் முறை, தேசிய காசநோய் ஒழிப்பு திட்டத்தின் கீழ், சுருக்கமான மற்றும் செயல்பாடு மிகுந்த சிகிச்சை முறை தற்போது பயன்பாட்டிற்கு கொண்டுவரப் பட்டுள்ளது. இதன்படி, முன்பு 9 முதல் 12 மாதங்கள் வரை அளிக்கப்பட்ட சிகிச்சை தற்போது 6 மாதங்களிலேயே அளிக்கப்படுகிறது.