அன்னை தெரசாவின் மிஷனரி அமைப்பின் FCRA உரிமத்தை புதுப்பிக்க மறுப்பு! மத்திய அரசு அதிரடி

பல்வேறு முரண்பாடுகளால் மதர்தெரசாவால் நிறுவப்பட்ட மிஷனரிஸ் ஆப் சாரிட்டி(MoC) அமைப்பின் FCRA உரிமத்தை புதுப்பிப்பதற்கான விண்ணப்பத்தை மத்திய உள்துறை அமைச்சகம் நிராகரித்து உள்ளது. மேற்கு வங்க முதல்வர் மம்தா பானர்ஜி மிஷனரிஸ் ஆப் சாரிட்டி அமைப்பின் வங்கிக் கணக்கு முடக்கப்பட்டதாகக் கூறி கண்டனம் தெரிவித்த நிலையில் உள்துறை அமைச்சகம் இந்த தகவலை வெளியிட்டுள்ளது.

கடந்த சில நாட்களுக்கு முன்பு குஜராத் மாநிலம் வதோதராவில் செயல்படும் மிஷனரிஸ் ஆப் சாரிட்டி அமைப்பின் இல்லத்தில் தங்கியுள்ள பெண்களும் சிறுமிகளும் மத மாற்றம் செய்யப்படுவதாக குற்றச்சாட்டு எழுந்தது. இதையடுத்து அந்த அமைப்பின் மீது சமூகநலத்துறை மற்றும் குழந்தைகள் நலக் குழு அதிகாரிகள் அளித்த புகாரின் பெயரில் முதல் தகவல் அறிக்கை பதிவு செய்யப்பட்டது.

அந்த இல்லத்தில் தங்கியுள்ளவர்களை கிறிஸ்தவ மதத்தை தழுவ செய்யும் முயற்சியாக கிறிஸ்தவ மத நூல்களை வாசிக்க அழுத்தம் தரப்படுவதாகவும், கிறிஸ்தவ மத வழக்கப்படி பிரார்த்தனை செய்ய வற்புறுத்தப்படுவதாகவும் குற்றச்சாட்டுகள் முன்வைக்கப்பட்டன. சிறுமிகள் கழுத்தில் சிலுவை அணிய வைக்கப்படுவதாகவும் பைபிள் வாசிக்க வைக்கப்படுவதாகவும் கூறப்பட்டது. மேலும் அங்கு தங்கியிருந்த ஒரு பெண் கிறிஸ்தவ ஆண் ஒருவருக்கு வற்புறுத்தி திருமணம் செய்து வைக்கப்பட்டதாகவும் குற்றச்சாட்டுகள் எழுந்தன.

இவை அனைத்தையும் மறுத்த மிஷனரீஸ் ஆஃப் சாரிடி அமைப்பு தாங்கள் பிரார்த்தனை செய்ததைப் பார்த்து குழந்தைகளும் அதை பின்பற்றியதாக விளக்கம் அளித்தது. எனினும் இந்து மத நம்பிக்கைகளை புண்படுத்தும் விதமாக பல செயல்களில் ஈடுபட்டதாகவும் எழுந்தா குற்றச்சாட்டுகளின் அடிப்படையில் புகார் பதிவு செய்யப்பட்டது. இந்நிலையில் மத்திய அரசு இந்த அமைப்பின் வங்கி கணக்குகளை முடக்கி விட்டதாகவும் இதனால் நாடு முழுவதும் உள்ள அவர்களது 22,000 பயனாளர்கள் பணியாளர்களும் உணவு மற்றும் மருத்துவ வசதியின்றி தவிப்பதாக மேற்கு வங்க முதல்வர் மம்தா பானர்ஜி தனது ட்விட்டர் பக்கத்தில் பதிவிட்டிருந்தார்.