கர்நாடகாவில் கண்டுபிடிக்கப்பட்ட லித்தியம்: எதிர்காலத்தில் மின்சாரா வாகனங்களின் உற்பத்தியில் தன்னிறைவு அடையும் இந்தியா...

மத்திய அரசு மின்சார வாகனங்களில் உற்பத்தி மற்றும் பயன்பாட்டை ஊக்குவித்து வருகிற நிலையில், மின்சார வாகனங்களில் பயன்படுத்தப்படும் லித்தியம் கர்நாடகாவில் கண்டுபிடிக்கப்பட்டுள்ளது. அது குறித்த முழு தொகுப்பு:

Update: 2024-07-28 09:51 GMT

மின்சார வாகனங்களின் உற்பத்தி திட்டம்:

பெட்ரோல் மற்றும் டீசல் பொருட்களின் உபயோகத்தை குறைக்கவும் சுற்றுசூழலை பாதுகாப்பதற்காகவும் தற்பொழுது மின்சார வாகனங்களின் உற்பத்தி மற்றும் பயன்பாடு மத்திய அரசால் ஊக்குவிக்கப்பட்டு வருகிறது. மேலும் மத்தியில் பாஜக தனது ஆட்சியை நிறுவியதிலிருந்து மின்சார வாகனங்களின் பயன்பாட்டை தொடர்ந்து வலியுறுத்தி வருகிறது. அதன் விளைவாக 2018 முதல் 2023 வரை மின்சார வாகனங்களில் பதிவு விகிதமானது 209.17% ஆக அதிகரித்துள்ளது. முன்னதாக இந்தியாவில் மின்சார வாகனங்களில் உற்பத்தி திட்டம் 2015 ஆம் ஆண்டு தொடங்கப்பட்டது. அதன்படி ஃபேம் இந்தியா திட்டத்தின் இரண்டாம் கட்டம் 2019 ஆம் ஆண்டு முதல் ஐந்து ஆண்டுகளுக்கு 10,000 கோடி ரூபாய் செலவில் செயல்படுத்தப்பட்டது.

அதிகரித்த மின்சார வாகன பயன்பாடு:

அதுமட்டுமின்றி மற்ற எலக்ட்ரானிக் சாதனங்களுக்கு உபயோகப்படுத்தப்படும் பேட்டரியின் விலையை குறைப்பதற்காகவும் நாட்டில் மேம்பட்ட வேதியல் செல் உற்பத்தி செய்வதற்கான உற்பத்தியுடன் கூடிய ஊக்குவிப்பு திட்டத்திற்கு பிரதமர் மோடி அரசு ஒப்புதல் அளித்தது. இதன் மூலம் பேட்டரி விலையும் குறையும், அதோடு எலக்ட்ரானிக் வாகனங்களின் செலவும் குறையும். மேலும் 2021 பட்ஜெட்டில் ரூபாய் 25,938 கோடி ஆட்டோமொபைல் மற்றும் வாகன உதிரி பாகங்களுக்கான உற்பத்தியுடன் கூடிய ஊக்குவிப்பு திட்டத்தின் கீழ் 5 ஆண்டு காலத்திற்கு ஒதுக்கீடு செய்யப்பட்டு, ஒப்புதல் அளிக்கப்பட்டது. இதன் விளைவாக ஒவ்வொரு மாநிலத்திலும் மின்சார வாகனங்களின் பயன்பாடானது அதிகரிக்க ஆரம்பித்தது, குறிப்பாக 2023 நிலவரப்படி தமிழ்நாட்டில் 1,73,152 மின்சார வாகனங்கள் உபயோகத்தில் உள்ளன. மேலும் அரசு பேருந்துகள் மற்றும் மற்ற வாகனங்கள் அனைத்துமே மின்சாரமயமாக்கப்பட்டு வருகிறது.

லித்தியம் என்றால் என்ன?

இப்படி மின்சார வாகனங்களின் பயன்பாட்டை அதிகப்படுத்துவதற்காக மத்திய அரசு பல நடவடிக்கைகளில் ஈடுபட்டு வருகிறது. அதோடு மின்சார வாகனங்கள் மற்றும் எலக்ட்ரானிக் பொருள்களில் பயன்படுத்தப்படும் முக்கிய உலோகமான லித்தியம் கண்டுபிடிப்பிலும் இந்தியா தொடர்ந்து பல ஆய்வுகளை மேற்கொண்டு வருகிறது. ஏனென்றால் லித்தியம் உலோகம் மின்சார வாகனங்கள் அனைத்திலும் பயன்படுத்தப்படுகிறது. மேலும் எலக்ட்ரானிக் பொருட்களான மொபைல் போன், லேப்டாப், அனைத்து வகையான பேட்டரிகளிலும் பயன்படுத்தப்படுகிறது. அதன்படி கடந்த வருடம் இந்தியாவில் முதல்முறையாக லித்தியம் உலோகம் கண்டுபிடிக்கப்பட்டது.

ஜம்மு - காஷ்மீர் மற்றும் கர்நாடகா:

அதாவது மத்திய அரசின் சுங்க அமைச்சகத்தின் கீழ் செயல்பட்டு வரும் இந்தியா புவியியல் ஆய்வு அமைப்பு நாட்டில் உள்ள கனிம வளங்களை கண்டறிய பல ஆய்வுகளை நடத்தி வந்தது. அதன் ஒரு பகுதியாக ஜம்மு - காஷ்மீரில் நடத்தப்பட்ட ஆய்வில் லித்தியம் இருப்பது கண்டுபிடிக்கப்பட்டது. மேலும் அந்தப் பகுதியில் மட்டும் 5.9 மில்லியன் டன் லித்தியம் இருப்பதாக மத்திய அரசு தெரிவித்தது. இந்த நிலையில், கர்நாடகா மாநிலத்தின் மாண்டியா மாவட்டத்தில் மர்னகல்லா பகுதியில் 1600 டன் லித்தியம் கண்டுபிடிக்கப்பட்டுள்ளதாக மத்திய அமைச்சர் ஜிதேந்திர சிங் தெரிவித்திருக்கிறார். ஏ.எம்.டி என்ற துறை மேற்கொண்ட ஆய்வில் கர்நாடகாவில் லித்தியம் இருப்பது உறுதி செய்யப்பட்டுள்ளதாக கூறியுள்ளார். மேலும் கர்நாடகாவை தவிர சட்டீஸ்கர் மாநிலத்திலும் லித்தியம் இருப்பதற்கான வாய்ப்புகள் இருப்பதாக அங்கும் இந்த துறை ஆய்வுகள் நடந்து வருகிறது. மேலும் மைக்கா என்கிற மினரல் ராஜஸ்தான், பீகார், ஆந்திர பிரதேசம் மற்றும் ஒடிசா உள்ளிட்ட மாநிலங்களில் அதிகமாக உள்ளது. அதோடு மைக்கா இருக்கும் மாநிலங்களிலும் இந்த லித்தியமும் இருக்கலாம் என்ற ஒரு கணிப்பு இருப்பதால் அங்கும் இந்த ஆய்வுகளை மேற்கொண்டு வருவதாக மத்திய அமைச்சர் ஜிதேந்திர சிங் தெரிவித்திருக்கிறார்.

லித்தியம் இறக்குமதி மற்றும் அதன் விலை:

மத்திய அரசு தொடர்ச்சியாக மின்சார வாகனங்களின் பயன்பாட்டை ஊக்குவித்து வருவதால் மின்சார வாகனங்களின் உற்பத்தியும் அதிகமாக தற்போது நடைபெற்று வருகிறது. இதனால் மின்சார வாகன உற்பத்தியில் லித்தியம் முக்கிய உலோகமாக இருப்பதால் அவற்றின் தேவையும் அதிகரித்துள்ளது. முன்னதாக ஆஸ்திரேலியா, ஜிம்பாபே, சிலி, அர்ஜென்டினா, பிரேசில் ஒலிவியா ஆகிய நாடுகளில் மட்டும்தான் லித்தியம் அதிகமாக காணப்பட்டு வந்தது. அதனால் இந்த நாடுகளில் இருந்து தான் லித்தியம் இந்தியாவிற்கு இறக்குமதி செய்யப்பட்டு வந்தது.

அதோடு இந்தியாவில் மெட்டல் வடிவிலான லித்தியத்தின் விலையானது ஒரு கிலோ 32 ஆயிரம் ரூபாய்க்கும், கார்பனேட் பவுடர் வடிவில் ஒரு கிலோ ஐந்தாயிரம் ரூபாய்க்கும், பேட்டரிகளில் பயன்படுத்தப்படுகின்ற லித்தியத்தின் விலையானது 500 ரூபாயிலிருந்து 50,000 ரூபாய் வரைக்கும் விலை போகிறது.

சிறகடிக்கப் போகும் இந்தியா:

இந்த நிலையில் இந்தியாவில் ஜம்மு - காஷ்மீர், கர்நாடகா ஆகிய பகுதிகளில் லித்தியம் இருப்பது கண்டுபிடிக்கப்பட்டுள்ளது. அதோடு லித்தியம் இருப்பதற்கான சாத்தியக்கூறுகளும் ஆந்திர பிரதேசம், பீகார், சட்டிஸ்கர், ஒடிசா ஆகிய மாநிலங்களில் இருப்பதாக கூறப்படுகிறது. இதனால் எதிர்காலத்தில் மின்சார வாகனங்களுக்கான மூலப்பொருளான லித்தியம் பேட்டரி இந்தியாவிலேயே தயாரிப்பதற்கான வாய்ப்புகள் ஏற்பட்டுள்ளது. அதோடு மின்சார வாகனங்களில் லித்தியத்தின் பயன்பாடு மிக முக்கியமாக பார்க்கப்படுவதால், எதிர்காலத்தில் மின்சார வாகனங்களில் உற்பத்தியிலும் இந்தியா கொடி கட்டி பறக்கும் என்றும் கூறப்படுகிறது.