கன்னியாகுமரியின் 'பெரிய கோவில்'!

இதனால் வெளியூர்களில் இருந்தும் பக்தர்கள் அதிக அளவில் வந்து விடுபட்டு செல்கின்றனர். கல்வெட்டுகளில் 'அரவநீள் சடையான்' என்று உள்ளதாகவும் மேலும் சோழீஸ்வரன் உடைய ராஜேந்திர சோழீஸ்வரமுடைய நயினார் பெரிய நயினார் என்றும் குறிப்பிடப்பட்டுள்ளதாக ஆராய்ச்சியாளர்கள் கூறுகிறார்கள். கோவில் அமைந்துள்ள சுற்றுப்புற தெருக்களும் சோழராஜா கோவில் தெரு என்ற பெயரில் அமைந்துள்ளன. தஞ்சை பெரிய கோவில் விமானத்தின் சாயலில் சிறிய அளவில் விமானமும் நான்கு பக்க கற்சுவர்களின்  மேற்கூறையில் நான்கு மூலைகளிலும் நந்தியின் சிலைகளும் அமைந்துள்ளன .சோழர்கள் காலத்திற்குப் பிறகு பாண்டிய மற்றும் திருவிதாங்கூர் மன்னர்களால் இந்த கோவில் புனரமைக்கப்பட்டுள்ளது.

கோவில் கருவறையில் வீற்றிருக்கும் லிங்க வடிவான சிவபெருமானின் மொத்த உயரம் 18 அடி ஆகும். விட்டம் 16 அடி. இதில் மூன்று அரை அடி உயரம் நிலத்தின் அடியில்  மீதி உள்ள 14 அரை அடி மண்ணில் புதைந்த நிலையிலும் லிங்க வடிவில் கிழக்கு பார்த்து அருள்பாலித்து வருகிறார் .தூய மனதுடன் பக்தி பரவசத்துடன் கருவறையில் இருக்கும் இறைவனை ஓம் நமசிவாய என்று இரு கரம் கூப்பி வணங்குபவர்கள் சிவபெருமானையே நேரில் பார்ப்பது போல் உணர்வதாக கூறுகின்றனர்.

பூமிக்கு அடியில் இருந்து இறைவன் அருள் செய்வதால் நில சம்பந்தப்பட்ட பிரச்சனைகள் இங்கு வந்து முறையிட்டால் உடனே தீரும் என்பது பக்தர்களின் நம்பிக்கையாக உள்ளது. இத்திருத்தலத்தில் அம்பாள் கோலவார்குழலாள் ஈஸ்வரி என்ற பெயரில் நின்றகோலத்தில் காட்சி தருகிறார் மற்றும் கோவில்களில் அம்பாள் எப்போதும் பக்தர்களை நேரில் பார்த்தபடி அருள் பாலிப்பார். ஆனால் இங்கு அம்மன் தனது முகத்தை சற்று இடது புறமாக சாய்த்து சிவனை ஓர கண்ணால் பார்ப்பது போல் அமைக்கப்பட்டிருப்பது ஆலயத்தின் தனிச்சிறப்பாகும் .

கோவிலின் தலவிருட்சம் வில்வமரம் ஆகும் .இந்த விருட்சம் அருகில் உள்ள கொன்றை மரத்துடன் சேர்ந்து பூஜிக்கப்படுகிறது. கொன்றை மரம் பங்குனி சித்திரை மாதங்களில் மாத்திரமே பூக்கிற இயல்பு கொண்டது. ஆனால் இங்குள்ள கொன்றை மரம் வருடத்தின் எல்லா மாதங்களிலும் பூத்துக் குலுங்குவது இக்கோவிலின் சிறப்பு. குமரி மாவட்டம் வரும் ஆன்மீக பக்தர்கள் நிச்சயம் சோழராஜா கோவிலுக்கு வந்து வணங்கினால் ஈசன் அம்பாளின் முழு அருளை பெற முடியும் என்கிறார்கள் இந்த ஊர் மக்கள்.

கோவில் நடை காலை 6.30 மணிக்கு திறக்கப்பட்டு 10.30  மணிக்கு அடைக்கப்படும். மீண்டும் மாலை 5 மணிக்கு நடை திறக்கப்பட்டு இரவு 7:30 மணிக்கு அடைக்கப்படும். இந்த கோவிலுக்கு மொத்தம் ஏழு பிரகாரங்கள் இருந்துள்ளது. ஆங்கிலேயர் வருகை உள்ளிட்ட பல்வேறு படையெடுப்பு காரணமாக இரண்டு பிரகாரங்கள் மட்டுமே தற்போது இருப்பதாக கூறப்படுகிறது.