எவ்வளவு சீக்கிரம் முடியுமோ அவ்வளவு சீக்கிரம் தடுப்பூசி செலுத்திக் கொள்ளுங்கள் - இந்திய அணியை சுழற்றியடிக்கும் கொரோனா!

இந்திய கிரிக்கெட் அணியின் கேப்டன் விராட் கோலி கொரோனா தடுப்பூசி செலுத்திக் கொண்டார். இந்த செய்தியை தனது  இன்ஸ்டாகிராம் பக்கத்தில் பகிர்ந்துள்ளார்.

உங்களால் எவ்வளவு சீக்கிரம் முடியுமோ அவ்வளவு சீக்கிரம் தடுப்பூசி செலுத்திக் கொள்ளுங்கள் என அந்த பதிவில் கோலி தெரிவித்துள்ளதாக தெரிகிறது. ஐபிஎல் தொடர் ஒத்திவைக்கப்பட்டுள்ள நிலையில் இந்திய அணி இங்கிலாந்தில் சுற்றுப்பயணம் மேற்கொண்டு விளையாட உள்ளது.

அடுத்து இளம் வீரர்கள் அடங்கிய இந்திய அணி ஜூலை மாதம் இலங்கை சுற்றுப்பயணம் மேற்கொள்ள உள்ளனர்.  தவான் மற்றும் ரஹானே ஏற்கனவே கொரோனா தடுப்பூசி போட்டுக்கொண்ட நிலையில், அவர்களை தொடர்ந்து கோலியும் தடுப்பூசிக்கான முதல் டோஸை செலுத்திக் கொண்டுள்ளார்.

இவரைப்போலவே இந்திய அணியின் வேகப்பந்து வீச்சாளர் இஷாந்த் ஷர்மாவும் கொரோனா தடுப்பூசி செலுத்திக் கொண்டதாக தெரிவித்துள்ளார். பெரிய பெரிய பிரபலங்கள் தங்களை கொரோனா தொற்றில் இருந்து பாதுகாத்துக்கொள்ள அடுத்தடுத்து தடுப்பூசியை நாடி வரும் நிலையில், பொதுமக்களும் அச்சமின்றி தடுப்பூசி போட்டுக்கொள்ள முன்வர வேண்டுமென கேட்டுக்கொள்ளப் படுகிறது.