இரண்டாவது டெஸ்ட் போட்டியின் போது அஸ்வினிடம் தமிழில் பேசிய வீராட் கோலி வைரல்!

இந்தியா வந்துள்ள இங்கிலாந்து கிரிக்கெட் அணி, இந்திய அணியுடன் நான்கு டெஸ்ட் போட்டிகள் கொண்ட தொடரில் பங்கேற்றுள்ளது. இந்த தொடரின் முதல் போட்டியில் இங்கிலாந்து அணி தோல்வியடைந்திருந்த நிலையில், இரு அணிகள் இடையேயான இரண்டாவது டெஸ்ட் போட்டி சென்னை சேப்பாக்கம் மைதானத்தில் நடைபெற்றது.இதில் டாஸ் வென்று முதலில் பேட்டிங் செய்த இந்திய அணி, தனது முதல் இன்னிங்ஸில் 329 ரன்கள் குவித்தது. இந்திய அணியில் அதிகபட்சமாக ரோஹித் சர்மா 169 ரன்களும், ரஹானே 67 ரன்களும், ரிஷப் பண்ட் 58* ரன்களும் எடுத்தனர். 

பின்னர் விளையாடிய இங்கிலாந்து அணி 134 ரன்களுக்கு ஆல் அவுட் ஆக இரண்டாவது இன்னிங்ஸில் இந்திய அணி 286 ரன்கள் அடித்தது. இதை தொடர்ந்து இங்கிலாந்து அணிக்கு இந்திய அணி 482 ரன்கள் இலக்காக நிர்ணயிக்கப்பட்டது. பின்னர் விளையாடிய இங்கிலாந்து அணி 162 ரன்கள் மட்டுமே எடுத்து 317 ரன்கள் வித்தியாசத்தில் தோற்றது. இந்தநிலையில், இந்த போட்டியில் தமிழக வீரரான அஸ்வினை, விராட் கோலி உள்பட இந்திய அணியின் வேறு சில வீரர்கள் தமிழ் வார்த்தைகளை உபயோகப்படுத்தி உற்சாகப்படுத்திய வீடியோ ஒன்று சமூக வலைதளங்களில் வைரலாக பரவி வருகிறது.

இங்கிலாந்து அணிக்கு கடும் நெருக்கடியை கொடுக்கும் வகையில் அஸ்வின் துல்லியமாக பந்துவீசி வந்த போது, அவரை மேலும் உற்சாகப்படுத்தும் விதமாக கேப்டன் விராட் கோலி உள்பட வேறு சில இந்திய வீரர்கள் “வேற லெவல்.. வேற லெவல்” என கோசமிட்டனர். இந்த வீடியோவை ஸ்டார் ஸ்போர்ட்ஸ் நிறுவனம் தனது ட்விட்டர் பக்கத்தில் வெளியிட்டுள்ளது, இதனை தமிழக கிரிக்கெட் ரசிகர்களும் வைரலாக்கி வருகின்றனர்.