தேர்தலுக்காக வாலை சுருட்டிய திமுக மீண்டும் முருங்கை மரம் ஏறி இருக்கிறது...அண்ணாமலை கண்டனம்..!

கடலூர் மாவட்டம் வடலூரில் உள்ள ஞான சபை முன்பு வள்ளலார் சர்வதேச மையம் அமைக்க உள்ளதாக தமிழக அரசு அறிவிப்பு வெளியிட்டிருந்தது. ஆனால் இதனை எதிர்த்து இந்து முன்னணி அமைப்பினர் ஆர்பாட்டம் நடத்தினர். இதனை அடுத்து இது குறித்த வழக்குகள் உச்சநீதிமன்றத்தில் பதியப்பட்டு விசாரிக்கப்பட்டு வந்தது மேலும் அந்த விசாரணையில் இன்று உச்ச நீதிமன்றம் சர்வதேச மையம் அமைய உள்ள இடத்தில் தொல்லியல் துறை ஆய்வு செய்து அறிக்கை சமர்ப்பிக்க வேண்டும் என்று உச்ச நீதிமன்றம் உத்தரவிட்டுள்ளது. 

முன்னதாக, தமிழக அரசின் அறிவிப்பை எதிர்த்து தமிழக பாஜக மாநில தலைவரும் கோவை பாஜக நாடாளுமன்ற வேட்பாளருமான அண்ணாமலை தனது எக்ஸ் வலைதள பக்கத்தில், நாடாளுமன்றத் தேர்தலுக்காக வாலைச் சுருட்டிக் கொண்டிருந்த திமுக அரசு, தேர்தல் முடிந்ததும் மீண்டும் முருங்கை மரம் ஏறியிருக்கிறது. வடலூரில், அருள்திரு வள்ளலார் அவர்கள் நிறுவிய சத்திய ஞானசபைக்குச் சொந்தமான இடத்தை, சர்வதேச மையம் என்ற பெயரில் ஆக்கிரமிக்கும் பணியை மீண்டும் தொடங்கியிருக்கிறது திமுக. 

கடலூர் மாவட்டம் வடலூரில், வள்ளலார் அவர்களின் ஆன்மீகப் பணிகளுக்காக, பொதுமக்கள் மனமுவந்து தானமாக வழங்கிய நிலத்தில், 150 ஆண்டுகளுக்கும் மேலாக, அனைவரின் பசி தீர்க்கும் மேன்மையான பணி நடைபெறுவதோடு, ஆண்டுதோறும், லட்சக்கணக்கான பக்தர்கள், தைப்பூச தினத்தன்று ஜோதி தரிசனமும் பெற்று வருகின்றனர். 

 இந்த நிலையில், திமுக ஆட்சிக்கு வந்ததும், சத்திய ஞானசபைக்குச் சொந்தமான இடம் கண்ணை உறுத்த, சர்வதேச மையம் என்று கூறி ஆக்கிரமிக்க முயற்சித்து வருவதை, கடந்த ஜனவர் 26 அன்று, குறிஞ்சிப்பாடி சட்டமன்றத் தொகுதியில் என் மண் என் மக்கள் யாத்திரையின்போது சுட்டிக்காட்டி, உண்மையிலேயே திமுக அரசின் நோக்கம் சர்வதேச மையம் அமைப்பதுதான் என்றால், சத்திய ஞானசபைக்குச் சொந்தமான ஏற்கனவே ஆக்கிரமிக்கப்பட்டுள்ள சுமார் 30 ஏக்கர் நிலத்தை மீட்டோ, அல்லது வேறு இடத்திலோ அமைக்க வேண்டுமே தவிர, மீண்டும் சத்திய ஞானசபைக்குச் சொந்தமான இடத்தை ஆக்கிரமிக்கக் கூடாது என்று கண்டனம் தெரிவித்திருந்தோம்.