சென்னையில் 31,400 கோடி ரூபாய் மதிப்பிலான 11 திட்டங்களுக்கு அடிக்கல் நாட்டும் பிரதமர் மோடி!

பிரதமர் நரேந்திர மோடி 26 அன்று ஹைதராபாத் மற்றும் சென்னைக்கு வருகை தருகிறார். பிற்பகல் சுமார் 2 மணியளவில், ஹைதராபாத் ஐஎஸ்பி கல்லூரியில் 20 ஆண்டு நிறைவு கொண்டாட்டத்தில் பிரதமர் பங்கேற்பார். பின்னர் பட்டமளிப்பு விழாவில் உரையாற்றுவார். மாலை சுமார் 5:45 மணியளவில், சென்னையில் நேரு  உள்விளையாட்டு அரங்கில்  31,400 கோடி ரூபாய் மதிப்பிலான 11 திட்டங்களுக்கு அடிக்கல் நாட்டுகிறார்.

சென்னையில் உள்கட்டமைப்பு மேம்பாடு, இணைப்பை மேம்படுத்துதல் போன்ற  ரூ.31,400 கோடி மதிப்பிலான 11 திட்டங்களுக்கு அடிக்கல் நாட்டுவார். இந்த திட்டங்கள் பிராந்தியத்தில் சமூக-பொருளாதார செழிப்பை கணிசமாக மேம்படுத்தவும், பல துறைகளில் மாற்றத்தக்க தாக்கத்தை ஏற்படுத்தவும், வேலை வாய்ப்புகளை உருவாக்கவும் உதவும்.

அப்போது 2900 கோடி ரூபாய் மதிப்பிலான ஐந்து திட்டங்களை பிரதமர் நாட்டுக்கு அர்ப்பணிக்கிறார். 75 கிமீ நீளமுள்ள மதுரை-தேனி ரயில் பாதை, தாம்பரம் - செங்கல்பட்டு இடையே 30 கி.மீ., நீளமுள்ள மூன்றாவது ரயில் பாதை ஆகியவற்றை பிரதமர் தொடங்கி வைக்கிறார். 

115 கிமீ நீளமுள்ள எண்ணூர்-செங்கல்பட்டு பிரிவு மற்றும் 271 கிமீ நீளமுள்ள திருவள்ளூர்-பெங்களூரு ETBPNMT இயற்கை எரிவாயு குழாய் திட்டம் ஆகியவையும் தொடங்கி வைக்கப்படுகிறது. இவற்றின் மதிப்பு 1760 கோடி ரூபாய். இதன் மூலம் தமிழ்நாடு, கர்நாடகா மற்றும் ஆந்திரப் பிரதேசத்தில் உள்ள நுகர்வோர் மற்றும் தொழிற்சாலைகளுக்கு இயற்கை எரிவாயு விநியோகம் எளிதாகும். 

பிரதான் மந்திரி ஆவாஸ் யோஜனா-நகர்ப்புறத்தின் கீழ் ரூ. 116 கோடி செலவில் கட்டப்பட்ட சென்னை லைட் ஹவுஸ் திட்டத்தின் ஒரு பகுதியாக கட்டப்பட்ட 1152 வீடுகளின் திறப்பு விழா நிகழ்ச்சியும்  நடைபெறவுள்ளது. 

ரூ. 14,870 கோடி மதிப்பிலான 262 கிமீ நீளமுள்ள பெங்களூரு - சென்னை விரைவுச் சாலையும் தொடங்கப்படவுள்ளது. இது கர்நாடகா, ஆந்திரா மற்றும் தமிழ்நாடு ஆகிய மாநிலங்கள் வழியாகச் சென்று பெங்களூரு மற்றும் சென்னை இடையேயான பயண நேரத்தை 2-3 மணிநேரம் குறைக்க உதவும். சென்னை துறைமுகத்தை மதுரவாயல் (NH-4) வரை இணைக்கும் 4 லேன் டபுள் டெக்கர் சாலை, சுமார் 21 கி.மீ நீளம், ரூ.5850 கோடி செலவில் கட்டப்படும்.