இன்று நவராத்திரி நிறைவு நாள்: சிவனுக்கே வரங்கள் அருளிய சித்திதத்ரி தேவி தாமரையில் அமர்ந்து காட்சி தரும் இனிய நாள்!

தீமைகளை அழித்து நன்மைகளை நமக்கு அள்ளிக் கொடுக்கும் வகையில் 9 சக்தி ரூபங்களில் தன்னை காட்டி அருள் புரிகிறாள் துர்கா சக்தி. மஹேஸ்வரி, கௌமாரி, வராகி, மகாலட்சுமி, வைஷ்ணவி, இந்திராணி, சரஸ்வதி, நரசிம்ஹி, சாமுண்டி என பல வகை ரூபங்கள் எடுத்தாலும் இவை அனைத்தின் அடிப்படை ஆதார சக்தி ஒன்றுதான். இந்த தெய்வங்கள் அனைத்தையும் ஒவ்வொரு வடிவில் ஒவ்வொரு நாளும் 9 நாட்களுக்கு நம் வீட்டிற்கே வரவழைத்து போற்றி வணங்கி வழிபடும் விழாவே நவராத்திரி விழாவாகும்.

மேற்கண்ட இந்த 9 நவசக்திகளையும் ஷைலாபுத்ரி, பிரம்மச்சாரினி, சந்திரகாந்தா, குஷ்மந்தா, ஸ்கந்தமாதா, கத்யாயினி, கல்ராத்திரி, மகாகவுரி மற்றும் சித்திதத்ரி என வட மொழிகளில் குறிப்பிடப்படுகின்றன.

மா சித்திதாத்ரி நான்கு கைகள் உடையவளாக இங்கு சித்தரிக்கப்படுகிறாள். முழுமையாக பூத்த அழகான செந்தாமரையில் அமர்ந்துள்ள இவள் ஒரு கையில் கடா , இன்னொரு கையில் சக்ரா , மற்றொரு கையில் சங்கு, மற்றுமொரு கையில் தாமரை மலர் ஏந்தி காட்சி தருகிறாள். அவள் மனிதர்கள், கந்தர்வர்கள், அசுரர்கள் மற்றும் தேவர்கள் ஆகியோரால் வணங்கப்படுகிறாள்.