தமிழகத்திற்கு அடுத்த 5 ஆண்டுகளில் ரூ.3,000 கோடி நிதியுதவி - சொன்னதை செய்து காட்டிய பிரதமர் மோடி!

சுகாதார உள்கட்டமைப்பை மேம்படுத்த அடுத்த 5 ஆண்டுகளில் தமிழகத்திற்கு ரூ.3,000 கோடி நிதியுதவி வழங்கப்படும் என்று பிரதமர் நரேந்திர மோடி தனது உரையில் தெரிவித்தார்.

பிரதம மந்திரி ஆயுஷ்மான் பாரத் சுகாதார உள்கட்டமைப்பு இயக்கம், குறிப்பாக மாவட்ட அளவில் சுகாதார உள்கட்டமைப்பு மற்றும் சுகாதார ஆராய்ச்சியில் உள்ள முக்கியமான இடைவெளியை நிவர்த்தி செய்வதை நோக்கமாகக் கொண்டுள்ளது. அடுத்த ஐந்து ஆண்டுகளில் தமிழகத்திற்கு ரூ. 3,000 கோடிக்கு மேல் உதவி வழங்கப்படும். மாநிலம் முழுவதும் நகர்ப்புற சுகாதாரம் மற்றும் ஆரோக்கிய மையங்கள், மாவட்ட பொது சுகாதார ஆய்வகங்கள் மற்றும் சிக்கலான பராமரிப்புத் தொகுதிகளை இது நிறுவ உதவும். இதன் மூலம் தமிழக மக்களுக்கு மகத்தான பலன்கள் இருக்கும்" என்று பிரதமர் கூறினார்.

முன்னதாக தமிழகத்தில் 11 மருத்துவக் கல்லூரிகளையும், சென்னையில் செம்மொழித் தமிழ் மத்திய நிறுவனத்தின் புதிய வளாகத்தையும் பிரதமர் மோடி புதன்கிழமை திறந்து வைத்தார்.

விருதுநகர், நாமக்கல், நீலகிரி, திருப்பூர், திருவள்ளூர், நாகப்பட்டினம், திண்டுக்கல், கள்ளக்குறிச்சி, அரியலூர், ராமநாதபுரம், கிருஷ்ணகிரி உள்ளிட்ட மாவட்டங்களில் இந்த மருத்துவக் கல்லூரிகள் திறக்கப்பட்டுள்ளன.

பிரதமர் தனது மெய்நிகர் உரையில், "ஒரு மாநிலத்தில் 11 மருத்துவக் கல்லூரிகள் ஒரே நேரத்தில் திறக்கப்படுவது இதுவே முதல் முறை" என்றார். கடந்த ஆண்டு அக்டோபரில், உத்தரபிரதேசத்தில் சித்தார்த்நகர், எட்டா, ஹர்டோய், பிரதாப்கர், ஃபதேபூர், தியோரியா, காஜிபூர், மிர்சாபூர் மற்றும் ஜான்பூர் ஆகிய மாவட்டங்களில் ஒன்பது மருத்துவக் கல்லூரிகளை பிரதமர் திறந்து வைத்தார். எனது சாதனையை நானே முறியடித்து உள்ளேன் என்று பிரதமர் கூறினார்.