பாஜகவுக்கு புதிய நிர்வாகிகள் பட்டியல் நாளை வெளியாக உள்ளது. தலைவர் பதவியில் இருந்து அண்ணாமலை மாற்றமில்லை என்ற தகவலும் வெளியாகியுள்ளது. பாஜக சார்பில் 42வது நிறுவன தினம் நாடு முழுவதும் கொண்டாடப்பட்டு வருகிறது. டெல்லியில் நடைபெற்ற விழாவில் பிரதமர் மோடி மத்திய உள்துறை அமைச்சர் அமித்ஷா, தேசிய தலைவர் ஜே.பி.நட்டா உட்பட பலர் கலந்து கொண்டனர்.
இந்த விழாவில் தமிழகம் உட்பட பல்வேறு மாநிலத் தலைவர்கள் கலந்து கொண்டனர். இதில் அண்ணாமலை மற்றும் வானதி சீனிவாசன் உட்பட பல்வேறு தலைவர்கள் பங்கேற்றிருந்தனர். அடுத்து வர இருக்கும் நாடாளுமன்ற தேர்தலில் கட்சியை பலப்படுத்துவது மற்றும் நிர்வாகிகள் நியமனம் செய்வது உள்ளிட்டவைகள் ஆலோசிக்கப்பட்டது. இந்த முகாமை தொடர்ந்து தமிழக தலைவர் அண்ணாமலை கடந்த 6 நாட்களாக டெல்லியில் முகாமிட்டிருந்தார். அதன் பின்னர் நேற்று (ஏப்ரல் 10) மாலை சென்னை திரும்பினார். இதனிடையே தமிழகத்தில் மாநில துணைத் தலைவர்கள், பொதுச்செயலாளர்கள், அமைப்புச் செயலாளர்கள் உட்பட பல்வேறு நிர்வாகிகள், மற்றும் மாவட்ட தலைவர்கள் பலர் நியமிக்கப்பட வாய்ப்பு உள்ளது.
மேலும், செயல்படாமல் உள்ள கட்சி நிர்வாகிகளை மாற்றிவிட்டு புதிய நிர்வாகிகள் நியமனம் செய்வதற்கான பட்டியலை தமிழக தலைவர் அண்ணாமலை வழங்கியதாக கூறப்படுகிறது. அதனடிப்படையில் புதிய நிர்வாகிகள் பட்டியல் வெளியிடப்பட உள்ளது. இதனால் தமிழக பாஜக நிர்வாகிகள் மத்தியில் பரபரப்பை ஏற்படுத்தியுள்ளது.