தமிழகத்திற்கான ரயில்வே பட்ஜெட் 8 மடங்கு அதிகரிப்பு... முழு விவரங்கள்...

தமிழகத்திற்கான ரயில்வே பட்ஜெட் 8 மடங்கு அதிகரிப்பு:

தமிழகத்திற்கான ரயில்வே பட்ஜெட் 8 மடங்கு அதிகரித்துள்ளது என்றும், ஒவ்வொரு மாநிலமும் அதற்குரிய பங்கைப் பெறுகிறது, இதில் அரசியலுக்கு இடமில்லை என்றும் மத்திய அமைச்சர் டாக்டர் ஜிதேந்திர சிங் கூறியுள்ளார். 2024-25 மத்திய பட்ஜெட்டின் முக்கிய அம்சங்களை வெளியீட்டு விழாவின் போது செய்தியாளர்களிடம் அவர் உரையாற்றினார். இதில் அவர்  தமிழ்நாட்டிற்கு இந்த பட்ஜெட்டில் உள்ள குறிப்பிடத்தக்க நன்மைகளையும் எடுத்துரைத்தார். இந்த பட்ஜெட் தொலைநோக்கு பார்வை கொண்டதாகவும், பிரதமர் மோடியின் இந்தியா 2047 தொலைநோக்கு பார்வைக்கு ஏற்ப அமைந்துள்ளதாகவும் அவர் விவரித்தார்.

ரூ .879 கோடியிலிருந்து ரூ .6,362 கோடியாக உயர்வு:

முன்னதாக, டாக்டர் ஜிதேந்திர சிங், கருத்து உருவாக்குபவர்கள், வர்த்தகத் தலைவர்கள், பட்டயக் கணக்காளர்கள், பொருளாதார அறிஞர்கள் மற்றும் பலருடன் பட்ஜெட் குறித்த கலந்துரையாடல் அமர்வை நடத்தினார். ரயில்வே பட்ஜெட்டில் அதிக நிதி ஒதுக்கீடு செய்யப்பட்ட மாநிலங்களில் தமிழகம் ரூ.6,362 கோடியை பெற்றுள்ளது. 6 வந்தே பாரத் ரயில்கள் அறிமுகப்படுத்தப் பட்டதாலும், 77 மாதிரி அம்ரித் ரயில் நிலையங்கள் மேம்படுத்தப்பட்டதாலும் மாநிலம் பயனடைந்துள்ளது. ஐக்கிய முற்போக்கு கூட்டணி ஆட்சியுடன் ஒப்பிடுகையில் தமிழகத்திற்கான ரயில்வே பட்ஜெட் எட்டு மடங்கு அதிகரித்து, ரூ .879 கோடியிலிருந்து ரூ .6,362 கோடியாக உயர்ந்துள்ளது, இது மாநிலத்தின் போக்குவரத்து உள்கட்டமைப்பை மேம்படுத்துவதற்கான மத்திய அரசின் உறுதிப்பாட்டை அடிக்கோடிட்டுக் காட்டுகிறது என்று அவர் தெரிவித்தார்.

நீலப் பொருளாதாரத்தின் ஆற்றலைப் பற்றிப் பேசிய அமைச்சர், விரிவான கடற்கரையுடன் கூடிய தமிழ்நாட்டின் கேந்திர அனுகூலத்தை வலியுறுத்தினார். பொருளாதார வளர்ச்சிக்கு மாநிலத்தின் கடல்சார் வளங்களை மேம்படுத்துவதை நோக்கமாகக் கொண்ட மீன்வளத் துறை மற்றும் ஆழ்கடல் இயக்கத்திற்கு கணிசமான ஆதரவை இந்த வரவுசெலவுத் திட்டம் உள்ளடக்கியுள்ளது. நீலப் பொருளாதாரத்தை உயர்த்துவதற்கும், தமிழ்நாட்டில் நிலையான வளர்ச்சி மற்றும் பொருளாதார பன்முகத்தன்மைக்கு புதிய வாய்ப்புகளை வழங்குவதற்கும் பாஜக அரசு இந்தத் துறைகளுக்கு முன்னுரிமை அளித்துள்ளது என்று அவர் குறிப்பிட்டார்.