நன்கொடைக்கு 20 ரூபாய் தூக்கிப்போட்டதால் அதிர்ச்சி - பேக்கரியில் ரகளையில் ஈடுப்பட்ட சிறுத்தைகள் கைது!

திருவாரூர் மாவட்டம், குடவாசல் கடைவீதியில் கட்சி நிதியாக குறைந்த அளவிலான பணம் கொடுத்ததால் பேக்கரியில் ரகளையில் ஈடுபட்ட விடுதலை சிறுத்தைகள் கட்சியை சேர்ந்த இரண்டு நிர்வாகிகள் அதிரடியாக கைது செய்யப்பட்டுள்ளனர்.

திருவாரூர் மாவட்டம், குடவாசல் பகுதியில் ஜெயச்சந்திரன் என்பவர் பேக்கரி கடை ஒன்று வைத்துள்ளார். இவர் நடத்தி வரும் கடைக்கு அவ்வப்போது கட்சியினர் நன்கொடைக்காக கையேந்தி வருவதாக கூறப்படுகிறது. இதனால் வேறு வழியின்றி கடை உரிமையாளர்களும் 5, 10 என்று நிதியாக கொடுத்து வருகின்றனர்.

இந்நிலையில், விடுதலை சிறுத்தை கட்சியை சேர்ந்த நகர செயலாளர் பால்கிட்டு, மஞ்சக்குடி செந்தில் கிய இரண்டு பேரும் தங்களது சிறுத்தைக்குட்டிகளை அழைத்துக்கொண்டு கடைக்கு வந்து, பன், இனிப்புகளை எடுத்து சாப்பிட்டுள்ளனர். அதன் பின்னர் கையில் இருந்த ஒரு சீட்டை கொடுத்துள்ளனர். அப்போது கட்சி வளர்ச்சி நிதிக்க பணம் கொடுங்கள் என்று கடையில் பணியாற்றிய ஊழியர்களிடம் மிரட்டியுள்ளனர். அவர்கள் கடை உரிமையாளர் வந்த பின்னர் கொடுப்பதாக கூறினர்.

ஆனால் விடுதலை சிறுத்தையினர் விட்ட பாடில்லை, அக்கட்சியின் நகர செயலாளர் மற்றும் கட்சியினர் பணம் கொடுக்கும்படி ஊழியர்களை வற்புறுத்தினர். ஏதோ போனால் போகட்டும் என்று கடை ஊழியர் 20 ரூபாயை தூக்கி போட்டுள்ளார். இதனால் தங்களை அவமானப்படுத்தி விட்டதாக சிறுத்தைகள் ரகளையில் ஈடுபட ஆரம்பித்தனர். மேலும், கடையில் இருந்த பொருட்களையும் தூக்கி போட்டுள்ளனர்.

இது பற்றி கேள்விப்பட்ட மற்ற கடை உரிமையாளர்கள் ஒன்று சேர்ந்து போராட்டத்தில் ஈடுப்பட்டனர். மாமூல் கேட்டு தொல்லைக் கொடுக்கும் சிறுத்தைகளை உடனடியாக கைது செய்ய வேண்டும் என்று போலீசாரிடம் மனு அளித்தனர். இதனை தொடர்ந்து வழக்குப்பதிவு செய்த போலீசார் விசிக நகர செயலாளர் பால்கிட்டு, மஞ்சக்குடி செந்தில்குமார் உள்ளிட்டோரை கைது செய்து சிறையில் அடைத்தனர். பணம் மற்றும் பன்னுக்காக ரகளை செய்துவிட்டு சிறுத்தைகள் சிறையில் அடைப்பட்டிருப்பது அக்கட்சியினர் மத்தியில் அதிர்ச்சியை ஏற்படுத்தியுள்ளது.

Source, Image Courtesy: Polimer